IDowns ithole uzwelo lwePSL ngemidlalo eyixinile

IPremier Soccer League isikuqinisekisile ukuthi usuku lomdlalo obhekwe ngabomvu weKaizer Chiefs neMamelodi Sundowns selushintshile. 

Ngenxa yokuphithana kohlelo lwemidlalo eSundowns, osekuyenze yadlala imidlalo eyisishiyagalombili kusukela ngoMarch 30, eminye yemidlalo yayo seyihlelwe kabusha. 

Kulezi zinsuku ezingu-20 ezidlule iSundowns beyidlala njalo ngemuva kwezinsuku ezintathu ekubeni ibuye ihambele namazwe akude ezwenikazi kwiCaf Champions League.

Ngenxa yalokhu iPSL isiwuhlele kabusha umdlalo weDStv Premiership weSundowns neChiefs. 

Bekumele ube ngo-Ephreli 30 kanti manje sewuzoba ngoMeyi 2, okusho ukuthi uhlehliswe ngezinsuku ezintathu ukunika iSundowns ithuba lokuphumula. 

Ngaphezu kwalokho, umdlalo weSundowns neTS Galaxy, obuhlehlisiwe ngenxa yokuthi leli qembu laba sengozini yemoto, usuzoba ngo-Ephreli 29. 

ISundowns izodlala umdlalo wayo wokugcina kwiligi ngo-Ephreli 28, sekudlule izinsuku ezintathu amanye amaqembu eyiphothulile iligi. 

ISundowns isivele iyiphethe ngesandla iligi njengoba inegebe lamaphuzu angu-13 kanti ishoda ngamaphuzu ayisithupha ukuthi iqede ngalesi sicoco. 

Isasalelwe yimidlalo eyisishiyagalombili. Nokho ukuhlehliswa komdlalo wayo wokugcina wesizini kuzoyixina kabana uma igcine ifikile kowamanqamu weNedbank Cup.

FUNDA NALA: Kuboshwe oweDowns ngecala lokushaya intombi

Lo mdlalo – ozoba seMbombela Stadium – uzodlalwa ngoMeyi 1, okuyizinsuku ezimbili ezine ngemuva kwalo mdlalo wayo wokugcina.