UHunt usale ebika imbiba, abike ibunzi iStellies sivulela isibhaxu
Usale ebambelela ngezidindi uGavin Hunt kulandela ukuthelwa isibhaxu sika 4-0 yiStellenbosch emdlalweni weNedbank Cup ngoMgqibelo emini.
EzikaHunt, iSuperSport United, zibukeke ziyinhlakanhlaka kulo mdlalo obuseDanie Craven Stadium.
IStellenbosch ivele yaphenduka uhlanya, yashaya noma sekubonakala ukuthi iSuperSport seyiphelelwe vele.
Inkundla ivulwe u-Anicet Aura ngomzuzu wesikhombisa. Nokuthi kuyiwe ekhefini liselinye igoli kube yinhlanhla yeSuperSport nje.
Kuqanse kakhulu esiwombeni sesibili uDevon Titus eshaya elesibili ngomzuzu ka-46.
Kubuye u-Andre De Jongh ngomzuzu ka-52, wenza kwaba u 3-0. U-Iqraam Rainers ushayele isipikili sokugcina ngomzuzu ka-61.
“Kuzima ukukwamukela. Kodwa siyababongela. Yiinke into beyivuna bona, ibhola belibhampa livune bona,” kusho uHunt ngemuva komdlalo.
“Asikwazanga ukuqonda izimo njengabo, bekunzima kakhulu ukudlala. Kodwa besingenza kangcono.
“Bekumele silithole igoli lokwenza kuyiwe ekhefini sekungu 2-1 ngoba lokho bekuzobacindezela.
“Bekuthi uma sisondela emapalini abo ibhola lisihlule ngoba belivele lipheshulwe umoya liziyele la lithanda khona.”
FUNDA NALA: UModise usola awaseKZN ‘ngokufukamela amaguncu’
IStellies seyijoyine iMamelodi Sundowns emzuliswaneni wemidlalo eyandulela owamanqamu kulo mqhudelwano.
