‘Kusekuncane lokhu,’ kusho uRomain Folz ngoChivaviro

URomain Folz uke wasebenza noRanga Chivaviro kwiMarumo Gallants futhi ukholwa wukuthi kusekukhulu lo mgadli azokwenzela iKaizer Chiefs.

UChivaviro ngomunye wabadlali abalandwe yiChiefs ekuqaleni kwesizini ngenhloso yokuqinisa iqembu.

Imlande kwiMarumo Gallants la abeshaye khona amagoli angu-16 kuyo yonke imiqhudelwano yize leli qembu laseLimpopo lagcina lidliwe yizembe. 

Nokho awumkhulu kangako umehluko abawenzile njengoba iqembu kumanje lilwela ukungena kwiTop 8. 

UChivaviro – oneminyaka engu-31 – uke waba nenkinga yokulimala okumhlalise ngaphandle izinyangana ezimbalwa.

Kodwa njengoba esebuyile, uyakhombisa ukuthi kukhona akuphethe okungenza umehluko kwiChiefs.

Ushaye amgoli amabili ngoLwesibili bebambana neTS Galaxy ngo 2-2 emdlalweni weDStv Premiership. 

URomain Folz, owayemqeqesha kwiMarumo, uthi nakanjani kuningi okuhle okusazovela ngalo mgadli. 

“Ngesikhathi ngifika okokuqala, uRanga wayengekho kwiGallants,” kusho uRomain Folz kwiFARPost. 

“Ngabona isicelo esasifakwe ngaye bemcelela ithuba, nganquma ukumbiza azojima nathi ukuze ngimbonele eduze. 

“Waba nathi amasonto amabili ngesikhathi silungiselela isizini, wasebenza ngokuzikhandla ukuze azitholele indawo eqenjini. 

“Unendlela yakhe yokudlala ehlukile eyenza kube nzima ezitobheni ukuthi zingamvimba. “Uma ezethemba, futhi edlaliswa ngendlela ehambelana naye, angingabazi ukuthi engashaya inqwaba yamagoli.” 

Enye into eyenza uChivaviro ahluke kwabanye abagadli, ngokusho kukaRomain Folz, wukuthi uhlezi enomoya owodwa futhi ezinikele emsebenzini wakhe.

“Into ebalulekile wukumgcina esemuzweni ofanele, bese umlekelela ngokuthi aqonde ukuthi yini edingeka kuye nokuthi kuzogcina kulungile.

FUNDA NALA: Kukhona leli ‘hlo’ lePirates elibukhali ethalenteni

“Mina uRanga ngambona engumdlali oziphethe kahle nozinikele, ngakho engakwazi ukubuyela efomini yakhe futhi ngiyamfisela lokho.”