Izinsolo ‘zokumakethana’ kubadlali be-Orlando Pirates
Ukuqhamuka kwevidiyo eveza abadlali abathile be-Orlando Pirates ‘bezincokolela’ ngokubheja seyisuse izinkulumomipikiswano.
Le vidiyo iveza unozinti uSipho Chaine ekhuluma ngokuthi engenza imali eningi kangakanani uma engabhejela umphumela womdlalo we-English Premier League.
Lo mdlalo bewuse-Old Trafford phakathi kweManchester United ne-Arsenal ngempelasonto edlule. Unqotshwe yi-Arsenal ngo 1-0.
I-Orlando Pirates seyikhiphe isitatimende iveza ukuthi le ngxoxo ngokubheja bekuwukuzincokolela nje phakathi kwabadlali.
Ngokwemithetho yebhola elikhokhelayo, abadlali abavunyelwe nhlobo ukuzibandakanya kwezokubheja kwanoma yiluphi uhlobo olufaka ezemidlalo.
Uma umdlali kutholakale ukuthi uyakwenza lokhu, angaxoshwa angaphinde azibandakanye ebholeni elikhokhelayo.
Impempe seyithole ukuthi abaphathi bePirates balusukumele lolu daba njengokusho kwabo esitatimendeni ukuthi bazoluphenya.
Umthombo osondelene nomunye wabadlali usivezele ukuthi abaphathi bafuna ukwazi ukuthi ividiyo ifike kanjani ezinkundleni zokuxhumana.
“Uzokhumbula ukuthi lento iyihlazo elibi, nelibeka igama leqembu endaweni engafanele neze,” kusho lo mthombo.
“Ukukhishelwa emphakathini kwezinto ezibucayi kanje, ezenzeka phakathi kwabadlali yinto esukunyelwayo.
“Phela uma kuvele lokhu, okusho nokunye okubi ukudlula lokhu kukngaputshuka ngelinye ilanga.
“Kwazi bani mhalwumbe nalena ikhishwe ngamabomu khona izofaka lo ovelayo (uSipho Chaine) enkingeni,” kusho lo mthombo.
Omunye umthombo uthe kuvele kukhona ‘ukumakethana’ okukhona kubadlali be-Orlando Pirates ngakho ngeke uthuke uma levidiyo ikhishwe ngabomu.
Ukumakethana yigama lomfakela elisho ukuhlekisana ihlomile kwabathile abaziwa ngokuba ngabangandawonye.
“Kumanje ngingakutshela ukuthi iyamakethana phakathi kuka(emgagula ngegama) no(Tapelo) Xoki ngoba kunomona okhona.
“Sesike sazizwa izinkulumo ezisuka ngaku(emusho ngegama) ekhala ngokuthi uXoki uthandwa abaqeqeshi futhi yena uvalelwa ngaphandle ngoba bengafuni aye kwiBafana Bafana.
“UXoki naye useyakwazi lokho kodwa ngoba uyazithulela ngiyazi akakaze akuveze eqenjini noma kuye lowo mdlali.
FUNDA NALA: Imenenja kaTeboho Mokoena icacisa ngenzingxoxo neDowns
“Uyena (uXoki) no(Olisa) Ndah abekho bahle impela kwabanye abadlali (abathile basemuva) ngoba badlala njalo,” kusho lo mthombo.
