URulani Mokwena uphawula ngokuboshwa yiTS Galaxy

URulani Mokwena, ongumqeqeshi weMamelodi Sundowns, uthi sekuyohlanganwa enkantolo neTS Galaxy emfake enkantolo.

Leli qembu likaTim Sukazi lisola lo mqeqeshi ngokudicilela phansi isithunzi salo nesomqeqeshi walo uSead Ramovic.

Lokhu kusukela ekutheni uMokwena wasola lo mqeqeshi ngokuthi wayalela abadlali bakhe ukuthi baziphindiselele kuBongani Zungu.

UZungu walimaza uBernard Parker emdlalweni weCarling Black Label Cup ngo-Okthoba 18 nyakenye.

Lo mdlali akakhombisanga ukuzisola yize uParker aphuka futhi wahlala isikhathi eside engadlali ngenxa yokumdlalisa kabi kwakhe.

Emdlalweni weDStv Premiership ngo-Ephreli 29, uZungu wadlaliswa kabi u-Orebotse Mongae, waphuma esethwelwe ngohlaka.

UMokwena wabe esenza izinsolo zokuthi uSead Ramovic uyena owakhombisa abadlali bakhe ividiyo yokulimala kukaParker, wathi bengakhohlwa okwenzeka.

ITS Galaxy yabe seyiyalela uMokwena ukuthi axolise kungakapheli amahora angu-24 kodwa wagcina engakwenzanga lokho.

Babe sebefaka amaphepha eNkantolo ePhakeme yaseGoli, bebophisa uMokwena ngaecala lokuhlambalaza leli qembu.

Izincwadi ezimbizela enkantolo uMokwena uzithole ngoLwesibili ngaphambi komdlalo walamaqembu obushune ngendlela emangalisayo.

Kusale kancane kubanjwane ngezandla ungakaqali, noma sewudlala nangemuva kwawo.

Ebuzwa ngalesi sinyathelo sokumfaka enkantolo, uRulani Mokwena ukhombise ukungabi nandaba, wafana nomuntu othi ‘gede’.

“Cha, angifuni ukukhuluma nganoma yini (ehlangene nalokho). Bangifake enkantolo ngakho asihlangane khona.

“Angizikhathazi ngeTS Galaxy. Ngizikhathaza ngeSundowns, ngiqashwe yiSundowns mina,” kusho lo mqeqeshi.

“Njengamanje, ngisho imizwa yami injena (ingemihle) kodwa kumele ngivveze ukuzigqaja kwami ngabadlali ngoba bekuwumdlalo onzima.”