BUKA: ULorch ubezijuxuza nama-‘slay queens’
SIHLE NGUBO
Kungenzeka ukuthi usezifake enkingeni ngokujabula kuze kweqe, uThembinkosi “Nyoso” Lorch, osanda kunqoba isicoco seligi neMamelodi Sundowns.
Kunevidiyo esisabalele lapho uLorch, owake wagijima kwi-Orlando Pirates, esijuxuza nabesimame ababili endaweni yokugruva, kucaca ukuthi kuphuziwe.
Kule vidiyo bubonakala kahle ubuso bukaLorch (obukeka edakiwe) ewotawotana nalaba besimame ababili kucaca ukuthi injabulo ingenhla, kudlala nomculo.
ULorch usajabulela ukunqoba isicoco seligi neqembu lakhe ebese lisiqukula okwesikhombisa kulandelana. Nokho iqembu nomqeqeshi uRulani Mokwena, bangase bangayithokozeli le njabulo kaLorch ayiveze ngokudlonya utshwala.
Lo mdlali uhlale elandelwa yizinto eziholela ekutheni abe sematheni ngokubhedayo nokushiya imibuzo ngokuziphatha kwakhe.
Ezinyangeni ezedlule uLorch uke wamiswa ekuzimbandakanyeni nePirates kulandela ukulahlwa yicala lokushaya owesifazane ayethandana naye.
UThembinkosi Lorch watholakala enecala lokushaya kanzima uFundiswa Mathithibela, wagwetshwa iminyaka emithathu elengisiwe iminyaka emihlanu ngaphansi kombandela wokuthi angatholakali enza okufanayo ingakapheli le minyaka.
Ngaphezu kwalokho wayalelwa ukuthi akhokhe u-R100 000 kwiPeople Opposing Women Abuse (POWA), okuyinhlangano elwisana nokuhlukunyezwa kwabesimame.
Ngesikhathi esanda kusayina kwiSundowns uLorch uphinde waba sematheni kuvela ukuthi usehlukene nesinqandamathe esiwumama wengane yakhe, uNatasha Thahane, ongumlingisi.
Nalapho bekulokhu kuputshuka imibiko engaqinisekiswanga yokuthi uNatasha ubesengajabulile ngokuhlukumezeka kodwa lo wesifazane akazange aphumele obala asho lokho.
FUNDA NALA: UScotty unozinti weMan City oholela ukuzilolonga nayo
NgoMgqibelo iSundowns izobhekana nePirates emdlalweni wamanqamu weNedbank Cup, eMbombela Stadium. Nakanjani uMokwena ngeke ajabule ukuthi sekukhona abadlali abangalali bephuza, besasalelwe umdlalo omkhulu kangaka.
Buka nansi ividiyo ngezansi:
