OweNjampela akasafuni ukuba umbeki wenkosi angabusi nayo
Umqeqeshi weNjampela FC, engompetha baKwaZulu-Natal beSafa ABC Motsepe League, uTshepo Motsoeneng, uthi asekulubalubela manje wukuqeqesha esigabeni esikhokhelayo seFirst Division (iMotsepe Foundation Championship).
UMotsoeneng usezakhele igama ngokuba ‘yindlondlo ye-ABC Motsepe League’ ngokunqoba iligi namaqembu akulesi sigaba, awase emidlalweni kazwelonke yokuhlungela ukukhuphukela kwiMotsepe Championship.
Muva nje lo mqeqeshi usanda kwenza adume ngazo ngokuhola ngempumelelo iqembu laKwaNongoma, iNjampela FC, lidla umhlanganiso kwiSafa KZN ABC Motsepe League.
Ngo-Ephreli 28 iNjampela, ebidle ubhedu kuStream A weKZN Motsepe League, idlale noMsinga United obudle ubhedu kuStream B.
Lona bekungumdlalo wamanqamu wokukhipha ompetha besifundazwe obudlalelwa kwaNgcedomhlophe Stadium, eMandeni, yanqoba iNjampela ngo 1-0 wegoli likaSibongimpilo Buthelezi.
Abafana Basekuthuleni, okuyisitekiso saleli qembu laKwaNongoma, baphakathi kwamaqembu ayisishiyagalolunye azobe emele izifundazwe zaseMzansi edlana imilala kweyokuhlunga kazwelonke.
Le midlalo izodlalelwa e-Upington, eNorthern Cape, kusuka ngoJuni 17 kuya kuJuni 23.
“Sengiqeqeshe isikhathi eside kwi-ABC Motsepe League, ngakho-ke nami ngiyafuna ukukhula njengomqeqeshi ngiqeqeshe esigabeni esikhokhelayo, ngizinze kusona,” kusho lo mqeqeshi.
“Yingakho-ke kuyisifiso sami esikhulu ukuthi iNjampela le engiyiqeqeshayo igcine ikwazile ukukhuphukela kwiMotsepe Championship.
Ngiphinde ngifise ukuthi abaphathi beqembu baqhubeke nokungethemba njengoba bengethemba ekuholeni iqembu.”
UMotsoeneng wayengungonozinti ngezikhathi zakhe emaqenjini okubalwa kuwo iSantos neFree State Stars.
Ngesizini ka-2019/2020 uMotsoeneng unyusele iBizana Pondo Chiefs, yase-Eastern Cape, kwiFirst Division, idla ubhedu kweyokuhlunga kazwelonke yeMotsepe League.
Nokho iPondo Chiefs, imidlalo yayo yasekhaya eyayiyidlalela eThekwini, yashesha yamkhomba indlela lo mqeqeshi kungakapheli nomzuliswano wokuqala wesizini ka-2020/2021.
Sekungumlando ukuthi leli qembu lagcina ligawulwa yizembe ngesizini yalo yokuqala esigabeni seMotsepe Championship.
Nakuba esabhekene nenselelo yokunyusela elinye iqembu kwiChampionship ngaphandle kwePondo Chiefs, kodwa uMotsoeneng usehole amanye amaqembu afinyelela kweyokuhlunga kazwelone yeMotsepe League.
Phakathi kwawo kubalwa kuwona iZizwe United yaseWestern Cape, iBuffalo City, iSinenkani FC neTornado FC, okungamanye amaqembu ase-Eastern Cape.
“Yize nginaso isipiliyoni sokuqeqesha kweyokuhlunga yeMotsepe League, kodwa lokho akusho ukuthi kuzoba lula kwiNjampela,” kuqhuba yena.
“Abadlali bami bakwazi kahle lokho, futhi bazimisele ngokusebenza kanzima njengoba kumanje simatasa ngamalungiselelo okuyodlala eyokuhlunga.
“Konke kusezandleni zabo ukuthi ukuthi balandele imiyalelo engizobanika yona nethimba lami labaqeqeshi, okunye sekuyozenzakalela.”
UMotsoeneng uke wasebenza isikhashana njengephini likaJoel Masutha kwiChippa United esigabeni seDStv Premiership.
Phakathi kwamaqembu akwezinye izifundazwe osekuqinisekisiwe ukuthi asezibekisele indawo kule midlalo kazwelonke yokuhlunga, kubalwa iDondol Stars yodumo yaseGauteng, neKruger United yaseMpumalanga.
Kwezinye izifundazwe ayikasongwa eyokuhlunga ompetha, kanti futhi kusaqulwa amacala njengenjwayelo.
