Aqhathiwe azogadulisana kweyokuhlunga ye-ABC Motsepe

SIHLE NGUBO

Aseqhathiwe ngokusemthethweni amaqembu azobhekana emidlalweni yokuhlunga ye-ABC Motsepe League ka-2023/2024.

Imidlalo yokuhlunga kazwelonke ye-ABC Motsepe, izodlalelwa e-Upington kusuka ngoJuni 17 kuya kuJuni 23. Iqembu elizobe limele iKwaZulu-Natal kule midlalo, yiNjampela FC.

Leli qembu licijwa uTshepo Motsoaneng. Lo mqeqeshi useke waveza ukuthi ufisa ukuqhubeka neqembu uma elikhuphulile, kungafani naphambilini.

INjampela iqhathwe neMpheni Defenders, yaseLimpopo, neFN RAngers, yaseWestern Cape, kuGroup A. Kwamanye amaqoqo akukahlaluki ukuthi yimaphi amaqembu azogadulisana njengoba engakapheleli.

Ku-Group B iqembu elivela e-Eastern Cape alikacaci, kanti nakuGroup C kusalindwe iqembu elivela eNorthern Cape. Le nto seyijwayelekile uma kuphela isizini njengoba amaqembu esuke efakelene amacala ehlukene kumaligi awo.

Amaqembu amabili azofinyelela kowamanqamu kule midlalo, azonyukela kwiMotsepe Foundation Championship ngesizini ezayo. Aphambana namabili asuka kule ligi ebuye yaziwe ngeNational First Division (NFD).

Wonke amathemba eKwaZulu-Natal alele kwiNjampela kule midlalo engavamisile ukuphela zingasukanga izinkulumo nothuthuva.

Aqhathwe kanje amaqembu:

Group A: Njampela FC (KZN), Mpheni Defenders (LP)FN Rangers (WC)

Group B: Manguang United (FS), Eastern Cape, Thames United (NW)

Group C: Northern Cape, Kruger United (MP), Dondol Stars (GP)