UMammila ‘uyayesaba’ iChiefs okwamanje, akayilungele

UMorgan Mammila, osanda kuchithwa yiChippa United, uzingela umsebenzi wokuqeqesha kodwa ngeke adlalele kwiKaizer Chiefs, ngokusho kwakhe.

UMammila ubekwiChilli Boys lapho efike khona ezoba umqeqeshi kodwa wagcina eseyiTechnical Director. Nokho leli qembu elizinze e-Eastern Cape ligcine limkhombe indlela ngesonto eledlule.

Uke wabonakala emdlalweni wokuhlunga weBaroka FC ne-University of Pretoria ngeSonto. Lokhu kuvuse izinsolo zokuthi angazithola ebuyela kuleli qembu ake waba yisikhulu esiphezulu kulona.

NgoMsombuluko iBaroka inqume ukumisa umqeqeshi wayo, uDan “Dance” Malesela. Lokhu kuziqinise kakhulu izinsolo zokuthi uMammila angase abuyele kuleli qembu.

“Angiyilungele iKaizer Chiefs okwamanje. Kumele ngithole iCaf A License yami kuqala, laphoke singakhuluma,” ucashunwe esho kanje ngesikhathi ebuzwa ngeChiefs, ekhuluma neKickOff.com uMammila.

Uthe nakanjani uwabhekile amaqembu angenabaqeqeshi njengamanje ngoba naye uyawufuna umsebenzi.

“Nokho ngizongqongqoza kuyo yonke iminyango njengawo wonke umuntu ofuna umsebenzi.”

UMammila usanda kwenza iCaf B License yakhe ngenyanga edlule, ekanye nabanye abaqeqeshi bePremier Soccer League (PSL).