Ibhola

INjampela yaseKZN ‘iyizinja’ ezilumayo kweyokuhlunga ye-ABC Motsepe

SIHLE NGUBO

Iqembu elimele iKwaZulu-Natal emidlalweni kazwelonke yokuhlunga ye-ABC Motsepe League, iNjampela, lizisondeze ekunyukeleni kwiMotsepe Foundation Championship, kulandela ukudlulela kowamanqamu kule midlalo ese-Upington, eNorthern Cape.

INjampela ishaye iFN Rangers, yaseWestern Cape, ngo 2-1 emdlalweni wesibili ngoLwesine emini. Kowokuqala idlale ngokulingana ngo 2-2 neMpheni Defenders, nokuchaza ukuthi iqede iqhwakele eqoqweni layo ngamaphuzu amane.

Amagoli eNjampela ashaywe uNqaba Zulu noLungani Ngema, kwathi elokubika leRangers leza noDarron Omaticus. Ukunqoba kweNjampela kuyisondeze ekuthokozeni nendumiso.

Amaqembu amabili azodlala kowamanqamu ngeSonto yiwona azokhuphukela kwiMotsepe Foundation Championship ngesizini ezayo. Njengamanje okusele kwiNjampela ukuthi imince kokugcina inqobe umdlalo owandulela owamanqamu.

Nakanjani kuzoba yinto enhle esifundazweni iKwaZulu-Natal ukuthi iqembu elisuka khona linyukele kwiNational First Division (NFD). Lokhu kuzokwenza abe makhulu amathuba okuthi kube khona iqembu lakulesi sifundazwe elinyukela kwiDStv Premiership ekupheleni kwesizini ezayo.