Motsepe League: iThames ifakele ‘amaKruger’ icala ngomdlali
PHILI HLONGWANE
Sekusuke umsindo ngomdlali weKruger United, yaseMpumalanga, nesanda kukhuphukela kwiMotsepe Foundation Championship, kulandela ukufinyelela kowamanqamu kweyokuhlunga ye-ABC Motsepe League, ebanjelwe e-Upington, eNorthern Cape.
IKruger ishaye iThames, yaseNorth West, ngo 1-0 kowandulela owamanqamu ngoLwesihlanu, yazibekisela indawo kwiChampionship. Nokho iThames seyifake icala ngomdlali weKruger, uThabang Gumede, esola ukuthi akabhalisiwe kahle kuleli qembu.
IThames ithi uGumede akazange asuswe ngokuphelele emabhukwini eRoyal AM. UGumede ubedlala kwiDStv Diski Challenge (DCC) kwiThwihli Thwahla ngaphambi kokujoyina iSummerfield Dynamos edlala kwi-ABC Motsepe League, KwaZulu-Natal.
Leli qembu laseMpumalanga lisayinise uGumede esuka kwiSummerfield ngoJanuwari nonyaka. Ushaye igoli ngesikhathi iKruger inqoba kwiNC Professionals emdlalweni wokuqala kweyokuhlunga. Ubekhona futhi emdlalweni owandulela owamanqamu bebhekene neThames ngoLwesihlanu.
Icala lingenile ngoLwesihlanu kodwa sangaba khona isisombululo. Liyaqhubeka ngoMgqibelo ngo-10 ekuseni. IThames ilnde uRichard Makhoba weRoyal AM ukuthi azoba ufakazi, kanti isinqumo silindeleke ngo-12 emini ngoMgqibelo.
IKruger kumele idlale kowamanqamu neHighbury FC,yase-Easten Cape, eshaye iNjampela FC, yaKwaZulu-Natal, ngo 2-1 kowandulela owamanqamu.