‘Angikho eSpain nePirates, ngisekhaya,’ kusho umdlali
PHILI HLONGWANE
Obengumdlali waMaZulu FC, uVeluyeke Zulu, uyaziqhelelanisa namahlebezi okuthi uhambe ne-Orlando Pirates njengoba iyolungiselela isizini entsha eSpain.
Ezinkundleni zokuxhumana kudume ukuthi lo mdlali, oyibamba emuva maphakathi, uhambe neBucs futhi angase asayine kuyona. UZulu, oneminyaka engu-29, wenqabe ukusayina inkontileka entsha noSuthu ekupheleni kwesizini edlule, wakhetha ukulishiya iqembu.
“Mina ngisekhaya oLundi, indaba yokuthi ngiseSpain ngiyayeshwama,” kusho lo mdlali.
“Azikho futhi izingxoxo eziphakathi kwami ne-Orlando Pirates. Okwamanje anginalo iqembu. Okwamanje kusathulekile. Ngizihlalele ekhaya kodwa ngiyazilolonga ukuze kuthi uma kukhona okuvelayo ngibe ngikulungele ukudlala.”
Lo mdlali uke wadlalela iRichards Bay isikhathi eside kusukela ngo-2017 kuya kua-2021. Uke wayibamba nakwiChippa United, iMaritzburg United neLamontville Golden Arrows.
I-Pirates iseSpain lapho idlala khona imidlalo yobungani ukulungiselela isizini entsha yeDStv Premiership. Ohleni oluvele ngesikhathi ibhekene nePlymouth, kaWayne Rooney, ubengekho uZulu njengoba kuke kwasho abanye ezinkundleni zokuxhumana.
