EzakamuvaIbhola

Sebewashaye bawavala amathikithi oweChiefs neYoung Africans

SIHLE NGUBO

Asephelile amathikithi omdlalo weKaizer Chiefs neYoung Africans, yaseTanzania, abazobanga iToyota Cup, eToyota Stadium, eBloemfontein, ngeSonto ngo-3 ntambama. 

Lo mdlalo kungokokuqala uba khona phakathi kompetha baseTanzania iYoung Africans, nezinkunzi zebhola eNingizimu Afrika, iChiefs. Nokho abalandeli babukeka bekulangazelele ukubona Amakhosi njengoba bewathenge ubuthaphuthaphu amathikithi, abebiza u-R40.

Okubukeka kusukumisa abalandeli beChiefs ukuthi leli qembu linomqeqeshi omusha, uNasreddine Nabi waseTunisia. Nakanjani abalandeli bafuna ukubona ukuthi lo mqeqeshi uza naluphi ushintsho njengoba iqembu libaphoxile ngesizini edlule.

Okunye abakubhekile ukuthi Amakhosi adlalise nabadlali abasha kulo mdlalo. AbeChiefs bebelokhu bethi kukhona abadlali abakhuluma nabo ngasese ukuze babasayinise. NgeSonto kungaba yithuba elihle lokuthi banikwe ithuba labo osekuvunyelwene nabo.

Umdlalo wala maqembu uzobhulelwa amazolo owezinkakha zeChiefs nezeBloemfontein Celtic ozoqala ngo-12 emini. Kulo mdlalo kuzobonakala abadlali bakudala beChiefs ababeyizithandwa zabalandeli.

Kubona kukhona uBrian Baloyi, uJabu Mahlangu, uCollins Mbesuma, uBernard Parker, uCyril Nzama, uFabian McCarthy nabanye. UThabo “Tsiki Tsiki” uyena ozobe engumqeqeshi wezinkakha zeChiefs.