Ucabhayeye wani lo odlalwa yiGallants, iBay neSekhukhune?
SIHLE NGUBO
Amanye amaqembu eBetway Premiership abukeka edidekile kakhulu ngaphambi kokuthi kuqale isizini entsha ka-2024/2025.
Okwenzeka kwiMarumo Gallants, yiRichards Bay FC neSekhukhune United akungabazeki ukuthi kubashiya bekhexile abalandeli bebhola baseNingizimu Afrika.
IGallants isanda kuthenga isitifiketi sokudlala kwiPremiership seMoroka Swallows. Ngemuva kwalokho imemezele ukuthi umqeqeshi wayo kuzoba uDylan Kerr, owake wacija iZinyoni, nokuthi izodlalela imidlalo yayo eBloemfontein.
Leli qembu selihlukene noKerr, ingakaqali nesizini, njengoba selilande uDan “Dance” Malesela. Lo mqeqeshi ugcine eqeqesha iBaroka FC egijima kwiMotsepe Foundation Championship.
IBay beyithembise ukuthi izomgcina umqeqeshi uVusumuzi “Kanu” Vilakazi ngemuva kokunqoba imidlalo yokuhlunga. INatal Rich Boyz iphinde yakhipha isitatimende iqinisekisa ukuthi uzohlala uVilakazi ngemuva kwesithangami nabezindaba, kade yethula abaxhasi abasha.
Usexoshiwe ke uVilakazi iqembu lingakadlali nowodwa umdlalo wePremiership. Kuvela ukuthi uBrandon Truter uyena ingase avale isikhala sikaKanu eMhlathuze.
ISekhukhune kungekudala yethule umqeqeshi waseGermany, uPeter Halbally. Akakahlali nakanye ebhentshini kodwa sekuvela imibiko yokuthi akeneme futhi angase alishiye iqembu. Kuthiwa leli qembu lingase libuyise uLehlohonolo Seema elimxoshe ngaphambi kokusongwa kwesizini edlule.
Womathathu la maqembu abukeka enza izinto ngendlela engahlelekile futhi lokhu kungase kube nomthelela ongemuhle emgqigqweni wawo kule sizini ezoqala. Ngeke kumangaze uma elinye lawo limkhomba indlela umqeqeshi kungakapheli nemidlalo eyishumi.
