Basola imenenja ngodaka olushaywa yiHollywoodbets SC emijahweni emikhulu
Alfred Ngubane
Kukhonjwa imenenja uManfred Seidler ngenjumbane ngokubhacaza kweHollywoodbets Athletics Club emijahweni emikhulu muva nje.
Le menenja ifike kule kilabhu esakhula kade yenza kahle kakhulu njengoba behlomule ngegolide kwiComrades ngo-2022 ngoNkosikhona Mhlwakwana .
NakwiTwo Oceans benza kahle. Kodwa ngaphansi kukaManfred Seidler kukhalwa ngapha nangapha ngaye.
Impempe ikuthole lokhu ngabangaphakathi kule kilabhu abacele singawavezi amagama abo.
Bathi kudumale wonke umuntu ngenkathi kungangeni noyedwa umsubathi wabo kwabayishumi bokuqala kwiComrades yakamuva.
UNkosikhona Mhlwakwana naye akaphuma ngisho kwabayishumi bokuqala njengoba ebesewugijima okwesithathu lo mjaho futhi ebengomunye wababhekiwe.
Ewugijima okokuqala wangena endaweni ka-11, ngonyaka odlule wangena kweyesithupha. Kepha kulokhu kubhede kakhulu.
“UManfred Seidler usehlulekile. Akanawo amaqhinga okunqoba imijaho ehlabahlosile njengeComrades neTwo Oceans,” kusho omunye osondelene nale klabhu.
“Uzoyiqumba phansi phansi. Umsebenzi omuhle wabaphathi abaqala lendlela uwudicilele phansi. Unikezwe umsebenzi wokufukula le kilabhu ukuthi incintisane namakilabhu afana neNedbank Running Club, Max Elite Athletic Club, Boxer Athletics Club ne-Intsika.
“Kodwa sekucacile uyamehlula,” kusho lo mthombo. Kuvela ukuthi uthe uma ethatha lo msebenzi walanda abasubathi abanamagama.
Usolwa ngokuthi ekwenzeni lokho ube esekhohlwa ngabafice kuleli qembu nokudale ukungasebenzisani okuhle.
FUNDA NALA: UPitso uthi uNabi muhle kwiChiefs, ushaya amakhala ngabadlali
Uhluleke nabo ke kodwa. Imizamo yokuthola lesi sikhulu ukuthi siziphendulele ayiphumelelanga.
Kodwa sizoqhubeka sizame ukumthola ukuze aziphendulele ngalezi zinsolo zokuthi uyiqumba phansi le kilabhu.
