Owayedlala kwiSundowns ulandele uMokwena kwi-Wydad

SIHLE NGUBO

UCassius Mailula ongumdlali weToronto, egijima kwiMLS, usejoyine iWydad Athletic Club yaseMorocco, eqeqeshwa uRulani Mokwena.

UMailula, oneminyaka engu-23, ubolekisiwe kuleli qembu kuze kuphele isizini. Ukhulele enkulisa yeMamelodi Sundowns kanti ukhombise ukuvuthwa ngaphansi kukaMokwena.

Selokhu efike kwiToronto lo mdlali usadlale imidlalo eyisithupha, washaya amagoli amabili, wase esiza ukwakha elilodwa. Akungabazeki ukuthi uMokwena ube nesandla esikhulu ekutheni uMailula abolekiswe kwi-Wydad.

Leli qembu laseMorocco kubhekwe ukuthi livuke lizithathe ngaphansi kukaMokwena nethimba lakhe. Ngesizini edlule alenzanga kahle lahluleka nokuzibekisela indawo kwiCaf Champions League.

Ngaphandle kwalokho iWydad ibinenkinga yokuthi ibimiswe yiFifa ukusayinisa abadlali. Nokho lokho seyikuxazululile njengoba izama ukuwinisa iqembu ingakaqali isizini entsha.

Omunye umdlali obedlala iSundowns, uBongani Zungu, naye ubhekwe ukuthi athushuke kwi-Wydad maduze nje.