EzakamuvaIbhola

URulani Mokwena ulokhu eqoqela okwakhe kwi-Wydad yaseMorocco

SIHLE NGUBO

Kubukeka sengathi obengumqeqeshi weMamelodi Sundowns, uRulani Mokwena, uzolokhu eqoqa konke okungokwakhe akusondeze kwi-Wydad Athletic Club, aseyicija.

Muva nje kuvela ukuthi umdlali waseMorocco obegijima kwiSundowns, u-Abdelmounaim Boutouil, uselishiyile leli qembu laseChloorkop. Kuthiwa lo mdlali oyibamba emuva kwesokunxele angase athushuke kuyona iWydad kungekudala.

UCassius Mailula, owayengumdlali weSundowns, usanda kubolekiswa kuleli qembu laseMorocco esuka kwiMLS. Uzohlala isizini yonke kwi-Wydad njengoba uMokwena ezama ukubumba kabusha iqembu.

UBongani Zungu, obedlala kwiSundowns kuke kwavela ukuthi naye ubheke eMorocco ukuyohlangana nomqeqeshi uMokwena. Lo mdlali uchithwe yiSundowns ekupheleni kwesizini edlule ngaphambi kokuthi ihlukane noMokwena. Nokho kuthiwa okwamanje akukho ukuvumelana ngoba kukhona izinto abangezwani ngazo.

Ngaphandle kwabadlali uMokwena kunabaqeqeshi bakuleli abafake ethimbeni lakhe ngemuva kokuqashwa yiWydad. Kubhekwe ukuthi lo mqeqeshi uzokwenza kanjani njengoba ezobe ezimele okokuqala eMorocco kulandela ukushiya eChloorkop.