I-Pirates izobhekana neqembu eliyigile igoda kwiChampions League
SIHLE NGUBO
I-Orlando Pirates izobhekana neqembu eliyikhiphe kwiCaf Champions League ngesizini edlule, iJwaneng Galaxy FC, emzuliswaneni olandelayo walo mqhudelwano.
Leli qembu laseBotswana liyigile igoda iBucs ngesizini edlule liyiwashisa ijezi kwiChampions League. Ngemuva kwemilenze emibili zazibambene ngo 1-1 kwase kushaywa amaphenathi iGalaxy yanqoba ngo 5-4.
EZimnyama zidlulele phambili ngokushaya iDisciples FC yaseMadagascar ngo 4-0 emlenzeni wesibili, e-Orlando Stadium, ngoLwesihlanu. Umlenze wokuqala waphela ngo 0-0 eMadagascar.
Nakanjani iPirates izofuna ukuziphindiselela kwiGalaxy eqede amaphupho ayo okuya phambili kwiChampions League ngesizini edlule.
Umdlalo womlenze wokuqala usekuhambeni eBotswana ngoSepthemba 13. Umlenze wesibili uzokuba seNingizimu Afrika ngoSepthemba 20. Lokhu kuchaza ukuthi iBucs ngeke iwudlale umdlalo weBetway Premiership njengoba imidlalo yeligi iqala ngoSepthemba 14.