AwaKwaZulu-Natal ayiqale kahle imidlalo yeChampionship

SIHLE NGUBO

Ayivule ngegiya eliphezulu isizini yeMotsepe Championship Foundation amaqembu aKwaZulu-Natal, iDurban City FC neMilford FC.

I-City, ebibizwa ngeMaritzburg United ngaphambi kokushintsha igama, ishaye iCasric Stars ngo 2-1, kwathi iMilford yashaya iVenda ngo 2-0. Lokhu kunika ithemba zisuka uma ubheka isimo sangesizini edlule samaqembu aKwaZulu-Natal.

Ngesizini edlule amaqembu akulesi sifundazwe ahluleke ancama ukudla isicoco esikhale semuka neMagesi, eqeqeshwa uClinton Larsen. Leli qembu selizoyibamba kwiBetway Premiership.

I-City neMilford bagcine behlulekile ukuqeda endaweni yesibili neyesithathu ukuze badlale imidlalo yokuhlunga. YiBaroka FC ne-University of Pretoria abadlale eyokuhlunga egcine inqotshwe yiRichards Bay FC, yahlala kwiPremiership.

Kweminye imidlalo yeChampionship iJDR Stars ishaye i-Upington United ngo 1-0 kwathi iPretoria Callies yanqoba ngo 1-0 kwiLeruma United. Kweminye imidlalo kuphele zibambene njengoba iHungry Lion ibambane neKruger United, esanda kunyukela kwiChampionship, ngo 1-1.

I-Highbury, nayo esanda kunyukela kwiChampionship, ibambane neBlack Leopards ngo 1-1, kwathi iBaroka yabambana ne-Orbit College ngo 1-1. I-University of Pretoria neCape Town Spurs, edliwe yizembe kwiPremiership ngesizini edlule, nabo babambane ngo 0-0.