I-Bucs ingase ichithe omunye umdlali lingakavali iwindi
SIHLE NGUBO
Umgadli we-Orlando Pirates, uZakhele Lepasa, angase ajoyine iSuperSport United ngaphambi kokuthi kuvalwe iwindi lokuhwebelana ngabadlali ngoLwesihlanu.
Lo mgadli uselizwa ngendaba ijezi ngaphansi komqeqeshi uJose Riviera. IBucs isanda kudedela uLesedi Kapinga naye obengasabonakali kuleli qembu.
ULepasa (27) ubedlala kahle ngesikhathi ebolekiswe yiPirates kumaTsatsantsa a Pitori nyakenye .Ubuyele kwiBucs wafika wenza kahle ebizwa nakwiBafana Bafana.
Nokho muva nje usezithola engahlali ngisho ebhentshini njengoba benza kahle abadlali abafana noRelebohile Mofokeng, uTshegofatso Mabasa, uThalente Mbatha noMonnapule Saleng.
Uma egcina ebuyele kwiSuperSport uLepasa uzofica abanye abadlali abake badlalela iPirates phambilini. Kulabo badlali kukhona ukaputeni uThulani Hlatshwayo, uVincent Pule, uTerrence Dzukumanja noSiphesihle Ndlovu.
I-Pirates izobhekana neChippa United emdlalweni weBetway Premiership e-Orlando Stadium, ngoLwesithathu ngo-7.30 ebusuku. NgoLwesibili iSuperSport ishaywe yiSundowns ngo 2-0 emdlalweni weligi.
