U-KG Rabada ungaphezulu emhlabeni futhi kumfanele
SIHLE NGUBO
UKagiso Rabada waseNingizimu Afrika usebuyele esicongweni kubadlali abashwibayo abakleliswe yi-International Cricket Council (ICC) emidlalweni yeTest.
URabada usanda kuhlanganisa amawikhethi angu-300 emidlalweni yeTest okumenza abalwe nabadlali baseNingizimu Afrika abambalwa ukwenza lokho.
Kulabo badlali kukhona uShaun Pollock, uJaques Kallis, uMorne Morkel, uDale Steyn u-Allan Donald noMakhaya Ntini.
Lo mshwibi wakuleli ubuyele esicongweni ngokugudluza uJosh Hazzlewood wase-England noJasprit Bumrah wase-India.
Njengamanje amaProteas abhekene neBangladesh emdlalweni wesibili weTest. Kweyokuqala uRabada uthathe amakhethi ayishiyagalolunye wasiza amaProteas enqoba ngamawikhethi ayisikhombisa.
I-Test yesibili iyaqhubeka kanti uRabada uvele usethathe amawikhethi amabili. INingizimu Afrika ikhethe ukubhetha yenza ama-run angu-575/6 yase ikhetha ukudedela iqembu lasekhaya.
KumaProteas kudlale kahle uTony de Zorzi (177), uTristan Stubbs (106), noWiaan Mulder (107). NgoLwesithathu kumiswe umdlalo (ngenxa yokungakhanyi kahle) iBangladesh ina-38/4 kwi-innings yokuqala. Ilandela ngemuva ngama-run angu-537.