UHarmer ushwibe uswidi wodwa amaProteas ebhaxa iPakistan kwiTest yesibili
SIHLE NGUBO
Ompetha bomhlaba emidlalweni yeTest, iNingizimu Afrika, babhaxabule iPakistan ngamawikhethi ayishiyagalombili kwiTest yesibili, eRawalpindi Cricket Stadium, ngoLwesine ekuseni.
AmaProteas adlale kahle kwi-innings yokuqala nokwenze ukuthi aqede ngeqembu lasekhaya ngosuku lesithathu lomdlalo.
IPakistan iyona ewine ithosi ngoMsombuluko yakhetha ukubhetha kuqala kule Test ebalulekile.
INingizimu Afrika ikuthile kunzima kakhulu ukukhipha leli qembu eligcine lenze ama-run angu-333, kwacaca ukuthi kuzoba umqansa kumaProteas.
Abashwibi bamaProteas abadlale kahle kwi-innings yokuqala kube uKeshiv Maharaj, othathe amawikhethi ayisikhombisa noSimon Harmer othathe amabili.
Ngasohlangothini lweqembu lasekhaya kudlale kahle uShan oqoqe ama-run angu-87 noSaud owenze angu-76.
Iphendula iNingizimu Afrika kwi-innings yayo yokuqala izinto siqale zangahamba neze kahle.
Nokho uTristan Stubbs, ophume esena-76, noTony de Zorzi, ophume ena-55, bazamile ukuzimazisa amaProteas.
Abadlali abashaye into ecokeme ekugcineni uMuthusamy, owenze ama-run angu-89, noKagiso Rabada omangaze abaningi ehlanganisa ama-run angu-71.
INingizimu Afrika igcine yenze ama-run 404, obekuchaza ukuthi seyihamba phambili ngama-run angu-71.
Kwi-innings yesibili yePakistan amaProteas asheshe acacisa ukuthi awusafuni ukudedela umdlalo.
UHarmer uthathe amawikhethi ayisithupha iPakistan yazithola ilahlekelwa amawikhethi ayishiyagalombili ingakahlanganisi ama-run enele ukunqoba umdlalo.
UHarmer ube umdlali wesine waseNingizimu Afrika ukuthatha amawikhethi angu-1000 kwi-first class crickey, elandela uCharlie Llewelyn, uMike Procter no-Allan Donald.
IPakistan igcine iphume yonke ina-138, obekusho ukuthi iNingizimu Afrika ibidinga ama-run angu-68 ukuze inqobe umdlalo.
U-Aiden Makram wenze ama-run angu-42 waphuma, kwathi uRyan Rickelton wenza angu-25, bawugoqa umdlalo.
IPakistan ikwaze ukukhipha uMarkram noTristan Stubbs (0) kwi-innings yesibili, kanti uDe Zorzi akabhekananga nanebhola elilodwa.
Ukunqoba le Test yesibili kusho ukuthi uchungechunge lwemidlalo emibili luphele kungu 1-1, ngoba iPakistan inqobile kwiTest yokuqala.
Ngo-Okthoba 28 kuzoqala imidlalo yeT20 kula mazwe womabili, kanti kuzodlalwa emithathu. Neyosusuku olulodwa izoba mithathu ngemuva kokuqeda eyeT20.
