IMagesi izozama ukucisha ugesi kwiChiefs koweligi
SIHLE NGUBO
IMagesi FC izozama ukuqhubeka nomgqigqo wokwenza kahle uma ibhekene namaqembu amakhulu, uma seyibhekene neKaizer Chiefs emdlalweni weBetway Premiership, ePeter Mokaba Stadium, ePolokwane, ngoLwesithathu ngo-7.30 ebusuku.
Omakoti bePremiership kusakhulunywa ngabo kulandela ukushaya i-Orlando Pirates ngo 3-2 emdlalweni weCarling Knockout Last 16 emasontweni edlule.
Leli qembu, elicijwa uClinton Larsen, lisendaweni ka-12 kwilogi yePremieship. Emidlalweni emihlanu linqobe owodwa, ladlala ngokulingana emibili lase lishaywa kwemibili.
IMagesi igcine ibambane neCape Town City ngo 0-0 ekuhambeni ngempelasonto. Nakanjani uLarsen angakuthokozela ukushaya elinye iqembu laseSoweto ngoLwesithathu.
IChiefs ibuya esibhaxwini sika 1-0 esithole kwiSuperSport United ngoMgqibelo odlule. Leli qembu bese lishaywa okwesibili kulandelana kweyeligi, njengoba ngaphambi kwalokho lishaywe ompetha beligi iMamelodi Sundowns ngo 2-1.
IChiefs izoya kulo mdlalo ngaphandle kuka-Edilson Castillo olimale ngesikhathi bebhekene neSuperSport. Umqeqeshi uNasreddine Nabi kuzomele azame ukugqugquzela iqembu linqobe umdlalo ngaphambi kokuyoyibamba kwiCarling Knockout ngempelasonto.
Amakhosi azokwamukela Abafana Ba’Style emdlalweni we-quarterfinal yeCarling Knockout eFNB Stadium, ngoMgqibelo ngo-6 ntambama. ISundowns, eshaywe yiPolokwane City ngo 1-0 ngeSonto, izovakashelwa yiCape Town City koweligi ngoLwesithathu ebusuku.