Konke kuvuna iSundowns ukuthi inqobe kwiChiefs koweCarling Knockout
SIHLE NGUBO
Umlando uvuna iMamelodi Sundowns ukuthi ivamise ukuphumelela uma ibhekene neKaizer Chiefs, kungakhathalekile ukuthi yimuphi umqhudelwano noma inkundla okusuke kudlalelwa kuyona.
La maqembu azobhekana, emdlalweni olindelwe ngabomvu, we-quarterfinal yeCarling Knockout, eFNB Stadium, ngoMgqibelo ngo-6 ntambama.
Amathikithi omdlalo asedayiswe aphela, osekusele manje ukuthi Amakhosi naBafana Ba’Style bangene enkundleni kuphele nya ukukhuluma.
Ngokwezinombolo iSundowns ingaphezulu kweChiefs uma kubhekwa imidlalo esidlalwe yila maqembu athathwa njengamakhulu ebholeni laseNingizimu Afrika.
Emidlalweni engu-45 iChiefs seyinqobe engu-14, iSundowns yanqoba engu-19, kwathi engu-12 yaphela ngokulingana.
E-FNB Stadium nakhona iSundowns ingaphezulu uma kubhekwa imidlalo esiyidlale neChiefs. Emidlalweni engu-22 iChiefs inqobe eyisithupha, iSundowns yanqoba eyisishiyagalombili, kwathi eminye eyisishiyagalombili yaphela ngokulingana.
ELoftus Stadium kusengaBafana Ba’Style abahamba phambili uma bebhekene naMakhosi. Emidlalweni engu-23 iChiefs iphumelele eyisishiyagalombili, iSundowns yaphumelela engu-11, kwathi emine yaphela ngokulingana.
NakweyePremier League ezikaManqoba Mngqithi zingaphezulu. Emidlalweni engu-36 iChiefs inqobe engu-12, iSundowns yanqoba engu-16, kwathi eyisishiyagalombili yaphela ngokulingana.
Egcina ukutholana la maqembu iSundowns inqobe ngo 2-1 emdlalweni weBetway Premiership, eFNB Stadium, emasontweni edlule. Kwaba nokukhuluma okukhulu mayelana nezinqumo zonompempe kulo mdlalo.
Umdlalo wokugcina womkhumulajezi odlalwe yila maqembu kube oweMTN8 ngoSepthemba 23 nyakenye. Nakhona lapho kunqobe iSundowns ngo 2-1 emlenzeni wesibili kowandulela owamanqamu. Umlenze wokuqala waphela ngo 1-1.
IChiefs ifinyelele kowamanqamu ngokushaya iSuperSport United ngo 4-0 kwiLast 16 yeCarling Knockout. Ngakolunye uhlangothi iSundowns ibhaxabule iLamontville Golden Arrows ngo 5-0 kuyona iLast 16.
NgoMgqibelo kuzobe kungumdlalo omusha ceke kula maqembu, kanti kunethemba lokuthi onompempe bazowuphatha kahle nokuthi kuzophinde kubonakale inqwaba yamagoli. Kodwa ifomu yakamuva nakho konke nje kuvuna iSundowns ukuthi inqobe.