iCarling Knockout Cup

IChiefs nePirates ethubeni lokuhlanganyela iDowns kwiCarling

SIHLE NGUBO 

Abadlali beKaizer Chiefs nabe-Orlando Pirates bangase bazithole bendawonye ezindlini zokushintshela e-Orlando Stadium, bebizana kahle njengabadlali beqembu elilodwa.

Izinkunzi zaseSoweto zinabadlali abane lilinye eqenjini iCarling All-Star, elizobhekana nompetha beCarling Knockout ka-2024, e-Orlando Stadium, ngoDisemba 21.

Umdlalo wamanqamu weCarling Knockout uzodlalwa yiMagesi FC neMamelodi Sundowns, eToyota Stadium, eBloemfontein, ngoNovemba 23.

ISundowns iyizimfivilithi ukuthi inqobe lo mdlalo. Lokhu kuchaza ukuthi Amakhosi neBucs bangathola ithuba elihle lokuhlanganyela Abafana Ba’Style koweCarling Cup ngoDisemba 21.

I-All-Star izobe inabadlali abahlanu beDiski Challenge, nabayisithupha bePremiership, abangeke babe yingxenye yeqembu elizoba ompetha beCarling Knockout.

Unozinti wePirates, uSipho Chaine, uzihola phambili ngamavoti angu-24 000. Ulandelwa uVincent Mokoena, weqembu leDiski leDiski leSunduwns, ngamavoti angu-15 000.

Endaweni yesithathu kukhona uRelebohile Mofokeng weBucs ngamavoti angu-13 000. Abadlali abane bePirates abahamba phambili, uChaine, uMofokeng, uJabulani Mokone noThalente Mbatha.

 Abamele iChiefs uNaledi Hlongwane, u-Aiden McCarthy, uXolani Mcossa noGaston Sirino. ISundowns yona inabathathu okunguMokoena, u-Asekho Tiwani noSiphelele Mkhulise.

Nokho laba badlali beSundowns ngeke bangene kwi-All-Stars uma inqoba iCarling Knockout. Kuyobe sekuthathwa abadlali ababalandelayo ngamavoti.

Kubaqeqeshi uManqoba Mngqithi weSundowns uyena ozihola phambili ukuthi aqeqeshe iCarling All-Stars. Ulandelwa uJose Riveiro wePirates, bese endaweni yesithathu kube uNasreddine Nabi ocija iChiefs.

Abalandeli kumele bathenge ingudu yeCarling Black Label engu-750ml noma ikani elungu-500ml, ukuze bavotele abadlali noma abaqeqeshi. Bazobe sebeshaya u-120*660*UNIQUE CODE# bese bandelele. Ukuvota kubalwa ngoDisemba 10.