Thola konke ngomqeqeshi omusha weDowns, kuphelile ngoMngqithi
SIHLE NGUBO
IMamelodi Sundowns seyiqinisekise ukuthi seyiqashe uCardoso Miguel njengomqeqeshi wayo omusha ukuya phambili kule sizini ka-2024/2025.
Lo mqeqeshi uzosebenzisana noSteve Komphela noKennedy Mweene. Lokhu kuchaza ukuthi kuphelile ngoManqoba Mngqithi, uRomain Folz noWendell Robinson kuBafana Ba’Style.
UCardoso umqeqeshi oneminyaka engu-52 ongowokudabuka ePortugal. Lo mqeqeshi ugcine eqeqesha i-ES Tunis yaseTunisia, anqobe nayo isicoco seligi ngesizini ka-2023/2024.
UCardoso unomlando omuhle ekuqeqesheni njengoba eseke waba yiphini lomqeqeshi kwiDeportivo La Coruna yaseSpain, ngo-2012 kuya ku-2013.
Useke wayibamba kwiRio Ave yasePortugal ngo-2021, yiCelta Vigo yaseSpain ngo-2018 kuya ku-2019 ne-AEK Athens yaseGreece ngo-2019
UMngqithi uyiqale kabi isizini ekhishwa yiStellenbosch FC kwiMTN8, lapho leli qembu laseKapa lishaye ompetha beligi ngo 1-0 kabili emilenzeni emibili kowandulela owamanqamu.
Kuphinde kwangahamba kahle kuBafana Ba’Style beshaywa yiMagesi FC ngo 2-1 emdlalweni wamanqamu weCarling Knockout emasontweni edlule.
KwiCaf Champions League nakhona ayiyiqalanga kahle imidlalo yamaqoqo iDowns. Ibambane ne-AS Maniema Union yaseDemocratic Republic of Congo ngo 0-0 eLoftus Stadium, kwathi ngempelasonto yaphinde yabanjwa yi-ASFAR yaseMorocco ngo 1-1 ekuhambeni.
Emidlalweni yeBetway Premiership iSundowns seyike yashaywa yiPolokwane City ngo 1-0. Nokho iyona esazihola phambili kwilogi yePremieship ngamaphuzu angu-21, alinganayo nawe-Orlando Pirates.
Okunye okungenzeka ukuthi kuphazamise uMngqithi emsebenzini wakhe ukuxabana nabadlali ababili beSundowns, uKhuliso Mudau noTebogo Mokoena.
Laba badlali bake bangadlala emidlalweni yeMTN8 kwavela ukuthi abezwananga noMngqithi. Ngebhadi ke lo mqeqeshi ugcine engayinqoba iMTN8 njengoba ephume kweyandulela owamanqamu.
