USeema ushiye iPolokwane, waqoma kwamakhelwane
ALFRED NGUBANE
ULehlohonolo Seema uselandele ezinyathelweni zikaVusumuzi Vilakazi eshiya isigubhukane kwiPolokwane City la abebonakala esawenza umsebenzi.
UVilakazi yena washiya kwiGolden Arrows kade zimhambela kahle izinto, wavumbuka kwiChippa United.
Nakhona kwiChippa ushiye isigubhukane ngeviki elidlule, wavumbuka kwiRichards Bay ngempelasonto.
USeema naye wenze leso eshiya kwiPolokwane la abethethe khona izintambo kuDuncan Lechesa ekuqaleni kwesizini.
ULechesa nguyena owayesize leli qembu ukwenyukela kwiDStv Premiership lisuka kwiMotsepe Foundation Championship.
Ugcine ehlehlile kuleli qembu njengoba manje eseqashwe yiVenda Football Club.
USeema ushiya nje ubesayibambe kahle njengoba ngaphansi kwesandla sakhe iqembu lidlale imidlalo engu-12 kwiligi, lanqobe emine, ladlala ngokulingana kwemihlanu, lahlulwa kwemithathu.
Impempe seyicoshe umoyana wokuthi uzovumbuka komakhelwane iSekhukhune United maduze njengoba ingenamqeqeshi nje.
Leli qembu lisanda kuxosha uBrandon Truter kanti amahlebezi athi isikhala sizovalwa uSeema.
Lo mqeqeshi ubeke wangaba khona eqenjini izinsukwana ezimbalwa njengoba ebeshonelwe nguyise eLesotho.
Kwabanye abaqeqeshi asebeshiyile noma baphelelwa wumsebenzi kule sizini kukhona uShaun Bartlett, uMolefi Ntseki noBrandon Truter.
FUNDA NALA: Amaphoyisa ashaye is’khala ‘ngebhomu’ eLoftus
UBarlett uxoshwe yiCape Town Spurs, uNtseke yena waxoshwa kwiKaizer Chiefs kanti uTruter udilizwe yiSekhukhune United.
