UMayele uyale iPirates seyithembile kwiChampions League
SIHLE NGUBO
Idedele inyoni isiyibambile i-Orlando Pirates eshaywe yiPyramids SC ngo 3-2 emdlalweni weCAF Champions League, e-30 June Stadium, ngoLwesihlanu ebusuku.
IBucs ilahle ukuhamba phambili ngo 2-1 kulo mdlalo, yagcina iphumile kwiChampions League.
Ukuphuma kweBucs kwiChampions League kuliqede nya iphupho kowamanqamu weChampions League.Inkundla ivulwe uRelebohile Mofokeng ngomzuzu ka-41 oshaye elihle igoli.
Nokho iPyramids ibuyile ngomzuzu ka-45+1 yashaya igoli elize noFiston Mayele. Lo mdlali uyena obeyiphela endlebeni kwiBucs
UMohau Nkota ushaye igoli elibeke iBucs ebuhleni ngomzuzu ka-52. Nokho ibuyile iPyramids yashaya elinye igoli kwaba ngu 2-2 kanti lize noRamadan Sobhi.
UMayele ugcine eyinqumile iPirates ngomzuzu ka-85 eshaya igoli eliweze iPyramids.
Liphele kanjalo iphupho like lokudlala owamanqamu weChampions League ohlanganise iSundowns nePirates.
