OweChiefs uthole umklomelo wegoli elihle kunawo wonke ngo-Ephreli
SIHLE NGUBO
Umdlali waphambili weKaizer Chiefs, uGlody Lilepo, ukhale wemuka nomklomelo iGoal of the Month ka-Ephreli, ngegoli lakhe elihle alishaya bebhekene neMarumo Gallants ngo-Ephreli 26.
Lo mdlali waseCongo wadlula abadlali abathathu kulo mdlalo, ngaphambi kokuthi alinathisele enethini ngodalimede weshodi.
Kulo mklomelo ubebanga noKamogelo Sebelebele weTS Galaxy ngegoli alishaya bedlala meMagesi FC.
Omunye obekhona uThulani Gumede weTS Galaxy, oshaye elihle ibhola engaphandle kwebhokisi bebhekene neCape Town City.
Umdlali wasesiswini weSekhukhune United, uKeletso Makgalwa, uthole umklomelo iPlayer of the Month ngokushaya into ecokeme ngo-Ephreli.
UMakgalwa udlale imidlalo emithathu kwemine yeqembu, wafaka isandla ekuhlaseleni kweqembu, wengeza ngokushaya igoli elibalulekile, wasiza ukushaya elinye.
Ukudlala kahle kwakhe kube nomthelela omkhulu ekutheni iSekhukhune iqede u-Ephreli ingayazi induku.
Lo mdlali ubebanga nozakwabo eqenjini uRenaldo Learner, ongangenelwanga yigoli emidlalweni emibili, noSanele Barns weStellenbosch FC, odlale kahle kule nyanga.
Umqeqeshi owenze kahle ngo-Ephreli kube ngu-Eric Tinkler weSekhukhune United, othole umklomelo iCoach of the Month.
Ngaphansi kukaTinkler iBabina Noko iqede inyanga (u-Ephreli) inqobe kathathu, yase idlala ngokulingana kanye.
UTinkler unqobe iCape Town City (2-1), iPolokwane City (2-0), ne-Orlando Pirates (1-0). Ube esedlala ngokulingana ngo 1-1 neTS Galaxy.
Le miphumela yenze iBabina Noko yabalwa namaqembu amathathu aphezulu kwilogi yePremieship.
Iqembu elixoshe uTinkler, iCape Town City, lizithola libhekene nokuyodlala imidlalo yokuhlunga ekupheleni kwesizini. ICityzens iyona esendaweni ka-15 ngamaphuzu angu-23 emidlalweni engu-26.
