IChilli Boyz yethule umqeqeshi omusha, akwaziwa uzoyiqeda yini isizini
SIHLE NGUBO
IChippa United seyimemezele uSinethemba Badela njengomqeqeshi ozohola iqembu ngesizini entsha yeBetway Premiership eqala ngo-Agasti.
UBadela ubekwiMamelodi Sundowns ngaphambi kokuthi abizwe uRulani Mokwena ukuthi azomsiza kwiWydad Athletic Club.
Ukuhlukana kukaMokwena, oke wacija iSundowns, naleli qembu laseMorocco bekuchaza ukuthi uBadela naye usephelelwe umsebenzi.
Nokho lo mqeqeshi sekuqinisekiswe ukuthi uzovala isikhala esivuleke ngokuhamba kukaThabo September okunguyena obeqeqesha iChilli Boys ngesizini edlule.
Omunye umqeqeshi osanda kukhonjwa indlela yiChippa, uMabhudi Khenyeza obeyiphini lomqeqeshi ngesizini edlule.
“Siyaziqhenya ngokumemezela umqeqeshi uSinethemba Badela njengomqeqeshi wethu ngesizini ezayo ethembisayo ka-2025/2026,” kusho isitatimende seChippa.
“Umqeqeshi uBadela udabuka eSterkspruit idolobha eliseSenqu Local Municipality, eyingxenye yeJoe Gqabi District Municipality, e-Eastern Cape.
“Uhambo lwakhe lungubufakazi bokuthi kwenzekani uma lokhu okuthembisayo kuhlangana nethuba.
“Siyaziqhenya ngokumnika ithuba lokuthi ahole iqembu lethu ezingeni eliphezulu.”
Umbuzo omkhulu owokuthi uBadela uzoyiqeda yini isizini kuleli qembu elidume ngokuxosha abaqeqeshi njalo.
“Umqeqeshi uBadela uza namava omhlaba njengoba ebesebenza kwiWydad Athletic Club, okungelinye lamaqembu engangatshazwa impumelelo yalo ebholeni lase-Afrika.
“Ungena ekuholeni ngokwesekwa yiqembu, abalandeli nesifundazwe sethu esisithandayo.”
Leli qembu likaSiviwe “Chippa” Mpengesi lisazomemezela ukuthi uBadela uzolekelelwa ubani ekuqeqesheni iChilli Boys.
