IPirates ingase ibhubhudle iPolokwane ngo-Appolis obeyidlalela
SIHLE NGUBO
Uma kuya ngemiphumela yakamuva phakathi kwe-Orlando Pirates nePolokwane City, iBucs izodlulela phambili kwiMTN8 njengoba kuqala imidlalo yalo mqhudelwano kul mpelasonto.
EZimnyama zizokwamukela iRise and Shine kwi-quarterfinal yeMTN8, e-Orlando Stadium, ngoMgqibelo ngo-3 ntambama.
IPirates ayiyinikanga lutho iCity ngesizini edlule, yize ibukeka iyingozi ishaya ompetha beligi iMamelodi Sundowns, nompetha beNedbank Cup, iKaizer Chiefs.
Emzuliswaneni wokuqala ngoSepthemba nyakenye, iBucs ishaye iRise and Shine ngo 3-0.
Kowesibili ngo-Ephreli nonyaka, iPirates iphinde yangalidedela igoli ishaya iPolokwane ngo 1-0.
Nokho yisizini entsha lena futhi amaqembu asayinise abadlali abasha.
Kuhlale kunzima ukuqagula ukuthi yiliphi iqembu elizowina uma kuseyimidlalo yokuqala ngqa yesizini.
IPirates iyona evikela indebe yeMTN8 eyithathe ngokushaya iStellenbosch FC kowamanqamu eMoses Mabhida Stadium, ngesizini edlule.
IBucs isanda kushiywa uMohau Nkota oseyodlala eSaudi Arabia kwi-Al-Ettifaq.
Imibiko yakamuva ithi uRelebohile Mofokeng angase alandele uNkota aye kuleli qembu.
IPirates ingelinye lamaqembu asayinise abadlali abaningi abasha njengoba kuqala isizini entsha.
Kulabo badlali kukhona u-Oswin Appolis obedlala kuyona iCity ngesizini edlule.
Lo mdlali uke wamataniswa neChiefs isikhathi eside kodwa kwamangala abaningi ethushuka kwiPirates.
Omunye umdlali okubhekiwe ukuthi ngabe uzolithola yini ithuba lokudlala, uSipho Mbule obebolekiswe yiSundowns kwiSekhukhune United ngesizini edlule.
Naye lo mdlali bekubhekwe ukuthi asayine kwiChiefs kodwa wagcina bephelele kwiBucs.
UYanela Mbuthuma, osuka kwiRichards Bay FC, ubukeka eyisithandwa somqeqeshi, u-Abdeslam Ouaddou, ngakho ngeke kumangaze uma engaqala umdlalo ngoMgqibelo.
Komunye umdlalo weMTN8 ngoMgqibelo kuzotholana phezulu iSekhukhune United neTS Galaxy, ngo-6 ntambama.
