AweBetway Premiership awayingeni eyokutotosa abaqeqeshi abashaya udaka
SIHLE NGUBO
Amaqembu adlala kwiBetway Premiership awabatotosi futhi awanaso nhlobo isineke nabaqeqeshi abehluleka ukuthola imiphumela emihle, selokhu kuqale isizini ka-2026/2027.
Lokhu kuhlalukiswa ukuthi sekuvele kuxoshwe abaqeqeshi abathathu bamaqembu ePremiership, yize amaningi esadlale imidlalo emihlanu kuphela.
Ngeledlule uCedric Kaze uyena umqeqeshi ophelelwe umsebenzi kuqala, ngemuva kokuchithwa yiSekhukhune United.
IBabina Noko idlale ne-Orlando Pirates kathathu kulandelana, kumbandakanya nemidlalo emibili yeMTN8, yashaywa kuyona yonke yangathola ngisho elilodwa igoli.
Lokhu kubukeka kubacikile abaphathi beSekhukhune, abanqume ukumkhomba indlela lo mqeqeshi waseBurundi, obejica iKaizer Chiefs ngokubambisana noYoussef Ben Khalil ngesizini edlule.
Kuleli sonto liqhubekile izembe nokugadla kubaqeqeshi, kulandela ‘ukukhululwa’ yiSiwelele FC kukaLehlohonolo Seema nephini lakhe uWillem Jackson.
Leli qembu liveze ukuthi alibaxoshile okwangempela okwamanje laba baqeqeshi, lisacubungula indlela elidlala ngayo iqembu, ngakho lingase libabuyise.
ISiwelele ingelinye lamaqembu angakanqobi nowodwa umdlalo selokhu kuqale isizini entsha yeBetway Premiership.
Emdlalweni wokugcina weligi ishaywe yiMamelodi Sundowns ngo 2-0, ngoLwesithathu, kade iphuma esibhaxwini sika 3-2 esithole kwiKaizer Chiefs ngeSonto.
NgoLwesithathu kuphinde kwakhala izembe kumqeqeshi, uPhuti Mohafe, nephini lakhe uMusa Bilankulu, abebeqeqesha iMarumo Gallants.
Nalo leli qembu aliyiqalanga kahle isizini ka-2026/2027 njengoba lingakanqobi nowodwa umdlalo weligi.
Emidlalweni emihlanu yeligi iGallants isadlale ngokulingana emibili, kwase kukhala isibhaxu kwemithathu.
“UTrevor Mathiane, oyiphini lesibili, uzobamba okwesikhashana njengomqeqeshi, ngesikhathi iqembu libheka umqeqeshi omusha,” kusho isitatimende seGallants.
“Khonamanjalo iqembu lingaqinisekisa ukuthi selithole uDaniel Msendami no-Abdoulaye Mariko, ababolekwe kwi-Orlando Pirates, kulandela ukuhamba kukaBheki Mabuza osejoyine iBucs.”
Indlela okwenzeka ngayo kule sizini kuyacaca ukuthi izembe lisazogadla nakwabanye abaqeqeshi okungabahambeli kahle selokhu kuqale isizini.
UBrandon Truter, oqeqesha iChippa United, noRonnie Gabriel, ocija iRichards Bay FC, abanye abaqeqeshi abangaxoshwa noma yinini.
IChilli Boys neNatal Rich Boyz abakanqobi selokhu kuqale isizini entsha nokubacindeza kakhulu njengoba imidlalo yeligi iqhubeka.
