OwePirates usebukeka eyogugela kwiChippa elokhu ebolekiswa
SIHLE NGUBO
Sekucisho kucace ukuthi uGoodman Mosele, we-Orlando Pirates, uyogcina egugele kwiChippa United alokhu ebolekiswa kuyona selokhu asayina kwiBucs.
UMosele, oneminyaka engu-25, usephinde wabolekiswa kwiChilli Boys isizini yonke njengoba kuqala isizini entsha yeBetway Premiership ngempelasonto.
Lo mdlali, ofike kwiPirates evela kwiBaroka FC, akakaze adlale isizini yonke kweZimnyama, abaningi bamazi egijima kwiChilli Boys.
NgoJanuwari nonyaka ubuyele kwiPirates ngemuva kokubolekiswa kwiChippa ekuqaleni kwesizini ka-2024/2025.
Udlale imidlalo embalwa esuka ebhentshini ngasekupheleni kwesizini edlule, sekulimele uMakhehleni Makhaula.
Ngaphambi kwalokho ubebolekisiwe kwiChilli Boys isizini yonke ngo-2023/2024.
Kusobala ukuthi indawo yakhe ayikho kwiPirates njengoba kubusa uMakhaula, uKabelo Dlamini noSipho Mbule esiswini.
Omunye umdlali ozoyibamba kwiChilli Boys ngesizini ezoqala, uSammy Seabi, osayine mahhala esuka kwiMamelodi Sundowns.
Naye lo mdlali ubengalitholi ijezi kwiSundowns kusukela afika evela kwiPolokwane City ngo-2019.
Useke wabolekiswa kwiMoroka Swallows nakuyona iChippa, njengoba esegcine ephelela kuyona ngokusemthethweni.
Leli qembu elizinze eGqeberha lizovula imidlalo yeBetway Premiership ngokubhekana nompetha beligi iSundowns, eNelson Mandela Bay Stadium, ngoMgqibelo ngo-3 ntambama.
IChilli Boys izobe iholwa umqeqeshi uSinethemba Badela, oke wasebenza kwiSundowns ezinkulisa.
Lo mqeqeshi ubeyiphini likaRulani Mokwena kwiWydad Athletic Club, yaseMorocco, ngesizini edlule.
IChippa ayinawo umlando omuhle uma ibhekene neSundowns. Emidlalweni engu-27 edlalwe yila maqembu iChilli Boys isanqobe emibili kuphela.
