I-CT City ibukeka ilungiselela ukudlala kwiPremiership kule sizini
SIHLE NGUBO
Indlela eyenza ngayo izinto iCape Town City FC, ibukeka ilungiselela ukuqhubeka nokudlala kwiBetway Premiership kule sizini ka-2025/2026, hhayi ukuyibamba kwiMotsepe Foundation Championship.
Leli qembu laseKapa limemezele ukuthi lisayinise umgadli waseNetherlands, uSimon van Duivenbooden, ngoLwesihlanu.
Lo mdlali, oneminyaka engu-23, ubesemabhukwini eVitesse edlalala esigabeni esiphezulu eNetherlands.
Lokhu kushiya imibuzo yokuthi iCityzens ingamlanda yini umdlali phesheya ifuna azodlala kwiChampionship.
Njengamanje kunecala elithinta lona leli qembu neMarumo Gallants, elingase liphazamise ukuqala kwemidlalo yePremieship ngempelasonto.
Leli cala lithinta uMonde Mpambaniso odlale imidlalo engu-20 yeGallants ngesizini edlule, futhi leli qembu lilivumile icala lagwetshwa yiPremier Soccer League (PSL) ngesonto eledlule.
Bekulindeleke ukuthi uma iGallants itholakala inecala izothathelwa wonke amaphuzu ewathole ibophele lo mdlali, nokuyinto engenzekanga.
IGallants ihlawuliswe u-R200 000 kwase kulengiswa uhhafu wale mali ukuthi ingatholakali inecala elifanayo ezinyangeni ezingu-24.
Lo mdlali yena akatholakanga enecala ngakho asikho isigwebo asinikwe yiPSL.
Ngokubika kweSABC, uHilton Epstein useqokwe ukuthi abe ngumehluleli weSafa njengoba iCity ilidlulisele phambili icala.
Kuthiwa leli qembu laseKapa selivele litshele iHigh Court ukuthi lizofaka isicelo sokumisa imidlalo yeGallants ne-Orbit College ngo-Agasti 9 no-12.
I-Premier Soccer League (PSL) ayikasho lutho mayelana nokuthi kukhona ukuphazamiseka okungeka emidlalweni yeBetway Premiership ngempelasonto.
IGallants kumele ibhekane neRichards Bay FC emdlalweni weBetway Premiership ngoMgqibelo, kanti i-Orbit College, engomakoti bePremiership, izobhekana naMaZulu FC ngawo uMgqibelo.
