ISharks XV neCheetahs bazongquzulana eClermont koweCurrie Cup
SIHLE NGUBO
Ngemuva kokudlala imidlalo emibili yeCarling Currie Cup ekuhambeni, iHollywoodbets Sharks XV izodlala umdlalo wokuqala ekhaya kulo mqhudelwano ngempelasonto.
Emizameni yokusa iSharks kubantu, umdlalo uzokuba seSugar Ray Xulu Stadium, eClermont, lapho iToyota Cheetahs izohlangabezana nabalandeli abamemezayo nabazimisele, abazokweseka iqembu eligqoke okumnyama nokumhlophe.
Umqeqeshi weqembu, uJP Pietersen, ukhethe ukwenza izinguquko ezimbalwa eqenjini lakhe kuleli sonto.
Nokho uyaqhubeka nendlela yakhe yokunika ithuba abadlali abasebancane abethembisayo, ebe efaka abanamava emuva.
UJacques Marais uzongena endaweni kaBryce Calvert kwi-hooker, kuthi uGideon Koegelenberg aqale endaweni kaDeon Slabbert kwi-lock.
Kolunye ushintsho uMatt Romao weSA Under 20, uzongena endaweni kaJannes Potgieter kwi-flank.
UVusi Moyo, ongomunye wabadlali beJunior Boks, uzoqala umdlalo engena endaweni kaJean Smith kwi-flyhalf.
UPietersen ukhethe ukufaka abadlali abanamava abazokweseka uMoyo, wafaka uYaw Penxe ophondweni, uMarnus Potgieter noDiego Appollis, maphakathi nenkundla, kwathi uJaco Williams wamusa emuva kwi-fullback.
ISharks XV iya kulo mdlalo ishayela phansi kulandela ukuthola isibhaxu kwiLions neVodacom Bulls emidlalweni emibili yokuvula yeCurrie Cup.
Umdlalo uqala ngo-5.10 ntambama eClermont, kanti iSharks yethemba ukuthi izokwazi ukuthola amaphuzu okuqala kwiCurrie Cup.
IHollywoodbets Sharks XV:
Phatu Ganyane
Jacques Marais
Lee-Marvin Mazibuko
Gideon Koegelenberg
Corne Rahl
Tino Mavesere
Matt Ramao
Nick Hatton (ukaputeni)
Bradley Davids (iphini likakaputeni)
Vusi Moyo
Yaw Penxe
Marnus Potgieter
Diego Appollis
Phiko Sobahle
Jaco Williams
Ebhentshini:
Willem van den Hever
Simphiwe Ngobese
Dian Heunis
Coetzee Le Roux
Jannes Potgieter
Ceano Everson
Jean Smith
Albie Bester
