Ibukeka ingamampunge eyengozi yemoto okuthiwa yehlele abePirates
SIHLE NGUBO
Ayibambeki eyokuthi i-Orlando Pirates ibe sengozini yemoto ngeSonto ntambama kwaba khona abathintekayo baze bayolaliswa esibhedlela.
Ezinkundleni zokuxhumana kusabalele ukuthi umqeqeshi wePirates, u-Abdeslam Ouaddou, nomdlali wasemuva uTapelo Xoli, yibona abangeniswe esibhedlela ngemuva kwale ngozi.
Okuxakayo ukuthi iPirates beyidlala ngeSonto nokuchaza ukuthi bekufanele isebenzise ibhasi uma isuka enkundleni eNelson Mandela Bay Stadium, iya ehhotela ngemuva komdlalo.
Izithombe zengozi ezivelayo kuFacebook zikhombisa imoto encane elimele ne-ambulance, alikho ibhasi elikhona.
NgoMsombuluko iPirates iqinisekise ukuthi uSipho Mbule uzovala isikhala sikaPatrick Maswanganyi, olimele, kwiBafana Bafana.
Leli qembu alizange liyithi vu eyokuthi kukhona ingozi yemoto eyenzekile ngeSonto ngemuva kokuthi iPirates ishaye iChippa United ngo 3-0 koweBetway Premiership eGqeberha.
IBafana izobhekana neLesotho emdlalweni wokuhlungela iNdebe yoMhlaba eBloemfontein ngoLwesihlanu ngo-6 ntambama.
Emdlalweni wesibili izobhekana neNigeria ngoSepthemba 9 khona eBloemfontein.
IPirates ingelinye lamaqembu anabadlali abaningi eqenjini lesizwe futhi akuveli ukuthi bakhona ababe sengozini yemoto ngeSonto ntambama.
Kulaba badlali kukhona uSipho Chaine, unozinti, uRelebohile Mofokeng, uMbule, u-Oswin Appollis, uKamogelo Sebelebele, uThalente Mbatha noMbekezeli Mbokazi.
Impempe izamile ukuthola ukuphawula kweBucs ngalolu daba kodwa uThandi Merafe wangaphendula noma esithunyelwe iWhatsApp.
