IPirates iphinde yagqema iStellies ingozi, yaqukula iMTN8 okwesine
SIHLE NGUBO
I-Orlando Pirates ibe ngompetha beMTN8 okwesine kulandelana, ngemuva kokushaya iStellenbosch FC ngo 3-0 emidlalweni wamanqamu walo mqhudelwano, eMbombela Stadium, ngoMgqibelo.
EZimnyama neStellies yibona abadlale owamanqamu weMTN8 ngesizini edlule, kwadlula iPirates ngo 3-1.
NgoMgqibelo iqembu laseKapa belizama ukuziphindiselela kwiBucs kodwa kwala kona, yize bekuyilona ebelidlala kahle ngesiwombe sokuqala somdlalo.
Ngokunqoba lo mdlalo wamanqamu iPirates ibe yiqembu lokuqala emlandweni, ukuqukula indebe yomkhumulajezi amahlandla amane kulandelana.
Umdlalo uphele ngo 0-0 emizuzwini engu-90, kwaphoqeleka ukuthi uye esikhathini esengeziwe.
Womabili amaqembu awatholile amathuba okushaya amagoli kodwa amaningi abephuma eceleni kwamapali.
Phakathi kwezinguquko esenziwe yiPirates ikhiphe uSipho Mbule, uThabiso Libitso noThalente Mbatha ngesiwombe sesibili.
Omunye wabadlali abangene besuka ebhentshini uTshepang Moremi, ushaye igoli ngomzuzu wesibili esikhathini esengeziwe.
Lokhu kuphoqe iStellies ukuthi ingasahlali emuva kodwa ihlasele izama igoli lokulinganisa.
Kunalokho kube yiPirates eshaye igoli lesibili kanti lize noTshegofatso Mabasa ngomzuzu ka-103, naye obengene esuka ebhentshini.
Kulo mdlalo kubonakale ukaputeni uNkosinathi Sibisi obese kunesikhathi eside engadlali ngenxa yokulimala.
Ungene endaweni kaRelebohile Mofokeng ngesiwombe sesibili esikhathini esengeziwe.
UMoremi uvele waqeda ngeStellies eshaya igoli lesithathu leZimnyama ngomzuzu ka-110.
Umqeqeshi wePirates, u-Abdeslam Ouaddou, ube ngowesine ukunqoba iMTN8 ngesizini yakhe yokuqala neqembu lePremier Soccer League (PSL).
Abanye abaqeqeshi asebeke benza lokhu uKaitano, esacijia iSuperSport United, uJosef Zinnbauer, eqeqesha iPirates, uManqoba Mngqithi noRulani Mokwena kwiMamelodi Sundowns.
