UBavuma namaProteas bawuqophe kabusha umlando behlaza i-India
SIHLE NGUBO
INingizimu Afrika iphule irekhodi ebese lihlale iminyaka ishaya i-India ngama-run angu-408 kwiTest yesibili e-Assam Cricket Association Stadium, e-India, ngoLwesithathu ekuseni.
Lokhu kunqoba iTest yesibili kuchaza ukuthi amaProteas akhale emuka nochungechunge lwemidlalo yeTest emibili ngo 2-0, okuyinto okungelula ukuthi amaqembu ayenze e-India.
INingizimu Afrika iyaqala ukunqoba uchungechunge lwemidlalo yeTest e-India eminyakeni engu-25.
Yagcina ukwenza lokhu ngo-2000, okukhombisa ngokusobala ukuthi amaProteas kungani ingompetha beWorld Test Cricket (WTC).
INingizimu Afrika iyona ebhethe kuqala yenza kahle kakhulu ngosuku lokuqala, iqoqa ama-run abalulekile.
AmaProteas aze akhishwa wonke ngosuku lwesibili kodwa umonakalo bese wenzekile ngoba abesehlanganise ama-run angu-489.
Kwi-innings yokuqala kudlale kahle uSuran Muthusamy owenze ama-run angu-109 noMarco Jansen ophume esena-93.
Ngasohlangothini lwe-India umdlali oshwibe kahle uKuldeep Yadav othathe amawikhethi amane.
Iphendula i-India kube sengathi idlala enkundleni ehluke kakhulu, nokusheshe kwacaca ukuthi ngeke iwunqobe umdlalo.
UJansen uthathe amawikhethi ayisithupha ukuqinisekisa ukuthi i-India iphuma yonke isahlanganise ama-run angu-201.
Abadlali abazamile kwi-India uYashasvi Jaiswal (58) noWashington Sundar (48).
INingizimu Afrika bekubhekwe iphoqe i-India ukuthi ibhethe futhi (follow on) ngoba ibihamba phambili ngama-run angu-281.
Nokho uTemba Bavuma nethimba labaqeqeshi bakhethe ukubuyela enkundleni babhethe, bezama ukuphumuza abashwibi.
INingizimu Afrika igcine yenze ama-run angu-260/5 kwi-innings yesibili, nobekusho ukuthi ihamba phambili ngama-run angu-549.
UTristan Stubbs ube nebhadi lokuphuma ena-94 kanti omunye umdlali obhethe kahle uTony de Zorzi naye obe nebhadi lokuphuma ena-49.
Kwi-innings yesibili ye-India bekubhoke uSimon Harmer othathe amawikhethi amane, iqembu lasekhaya lazithola lina 84/5.
UHarmer uqhubekile wathatha amanye amawikhethi amabili njengoba egcine enayisithupha kulo mdlalo.
Ulekelwe uKeshav Maharaj othathe amawikhethi amabili okugcina, kwaphela kanjalo nge-India.
U-Aiden Makram uqophe owakhe umlando enqaka amabhola ayisishiyalolunye emdlalweni weTest.
“Umuzwa omnandi. Akulula ukuza e-India unqobe uchungechunge lwemidlalo yeTest,” kusho uMarkram ngemuva komdlalo.
“Ngiyaziqhenya ngeqembu esinalo, kuyisivivinyo esikhulu ukuza lapha sifike sinqobe…abafana bashaye into ecokeme kakhulu kulo mdlalo.”
URavindra Jadeja uyena obhethe kahle kwi-India njengoba ephume ena-54. Abanye akukho okutheni abakwenzile i-India yakhishwa yonke ina-140.
Lokhu kuchaza ukuthi uBavuma usenqobe imidlalo engu-11 njengokaputeni kwengu-12 ehola iqembu.
