Ukaputeni wamaProteas udlale ingcwenga beshaya i-England
SIHLE NGUBO
Ukaputeni weNingizimu Afrika, uLaura Wolvaardt, ube yisibani ehola iqembu lakhe lishaya i-England ngamawikhethi ayisithupha emdlalweni wosuku olulodwa wokuqala, eDiamand Oval, eKimberly, ngoLwesithathu.
UWolvaardt wenze ama-run angu-59 (114) ukuqinisekisa ukuthi amaProteas ahamba phambili ngo 1-0 kule mdlalo emithathu yosuku olulodwa.
I-England iyona ewine ithosi yakhetha ukubhetha kulo mdlalo. Ibafice bemi ngomumo abashwibi beNingizimu Afrika abangavumanga ukuthi ibhethe ngokuthanda.
I-England iphume yonke ina-186 kuma-over angu-38.4 (50). UMarizzane Kapp noDercksen bathathe amawikhethi amathathu emunye, kwathi uNonkululeko Mlaba wathatha amabili.
Kwi-England kudlale kahle uKnight (40) noCharlie Dean (47*). AmaProteas abedinga ama-run angu-187 emabholeni angu-300 ukuze anqobe lo mdlalo wosuku olulodwa.
Ukuphuma kozakwabo akuzange kumkhathaze kakhulu ukaputeni weNingizimu Afrika obelokhu eyibambe ishisa kuqala i-innings yeqembu lakuleli.
Omunye umdlali owenze kahle uDercksen ophume ena-27, kwathi uKapp wenza ama-run angu-21. UNadine ungene wawusheshisa umdlalo waqeda ena-48 emabholeni angu-28.