UBaartman noDe Kock baweze amaProteas eshaya i-India koweT20
SIHLE NGUBO
INingizimu Afrika ibuyise ithemba lokunqoba imidlalo ewuchungechunge yeT20, ishaya i-India ngama-run angu-51, e-New PCA Stadium, eNew Chandigarh, ngoLwesine.
AmaProteas abekudinga ukunqoba lo mdlalo wesibili kulandela ukushaywa kabuhlungu kowokuqala ngoLwesibili.
Lokhu kunqoba kuchaza ukuthi sezibambene ngo 1-1 kule midlalo emihlanu ewuchungechunge yeT20.
I-India iyona ewine ithosi yakhetha ukushwiba kuqala kulo. Bekunamazolo enkundleni ngakho abashwibi bebekuthola kunzima ukushwiba.
Kube ukudlala kahle kukaQuinton de Kock, ophume esehlanganise ama-run angu-90, okwenze amaProteas azithola esendaweni enhle.
Ubelekelelana nokaputeni u-Aiden Makram (29) ongene sekuphume uReeza Hendricks, obeqale noDe Kock.
Abanye abadlale kahle kubhetha iNingizimu Afrika, uDavid Miller (20*) noDonovan Ferreira (30*).
Iphendula i-India iqale kabi ilahlekelwa amawikhethi amathathu ngokushesha, okuyicindeze kakhulu.
Bekubhoke uMarco Jansen, othathe amawikhethi amabili kwi-powerplay, walekelwa uLungi Ngidi othathe yaba yinye, abuye wayengeza ngasekupheleni komdlalo aba mabili.
UTilak Varma (62) uzamile ukubambelela kodwa ubelokhu eshoda nabezobambisana nabo, belokhu bephuma.
Omunye umdlali obhethe kahle kwi-India uJitesh okhishwe uLutho Sipamla esehlanganise ama-run angu-27.
USipamla ugcine ethathe amawikhethi amabili, kwathi-Ottneil Baartman, oshwibe kahle kakhulu, wathatha amane.
UBaartman obe umdlali wosuku uthe: “Kumele ngihlale ngilungile ngoba abashwibi abaqala phambili yibona abahlola inkundla ukuthi imi kanjani.”
I-India igcine ikwaze ukuhlanganisa ama-run angu-162 yapha yonke, yehluleka ukufika ku-214 ebuliwubekelwe amaProteas.
Emdlalweni olandelayo la maqembu azophinde atholane phezulu eHimachal Pradesh Cricket Association Stadium, ngeSonto ngo-3.30 ntambama.
