Ubuhlathi obuqhubeka kwiChippa bungase buyiholele ezembeni kulokhu
SIHLE NGUBO
Ziyaqhubeka izinkinga ezijwayelekile kwiChippa United, okwaziwayo ukuthi akupheli isizini ingaxoshanga okungesani abaqeqeshi ababili.
Njengamanje leli qembu, elizinze eGqeberha, lilungiselela ukwehlukana neSporting Director, uSinesipho Mali, ofike kuleli qembu evela kwiSekhukhune United.
UMali ufike kwiChilli Boys ekuqaleni kwesizini, wangatholana kahle nobengumqeqeshi uSinethemba Badela, wagcina eshiyile lo mqeqeshi.
Kuvele ukuthi uMali ubelokhu engqubuzana nabanye abaqeqeshi abafike ngemuva kwalokho, okungesinye sezizathu iqembu lizithola likunombolo 16, ngamaphuzu ayisishiyagalolunye emidlalweni engu-15.
Kuthiwa uMali ufuna ukushiya leli qembu likaSiviwe “Chippa” Mpengesi ukuze agxile kwiBafana Bafana, edlala kwi-Africa Cup of Nations (AFCON) nonyaka, neNdebe yoMhlaba nonyaka ozayo.
Kwenzeka konke lokho nje iChippa kusamele ilungise indaba yemali eyikweleta umqeqeshi uLuc Eymael.
Bakhokhe u-25% ngoNovemba 1, baphinde bakhokha omunye u-25% ngoNovemba 15, okuchaza ukuthi ukhona u-50% abangawukhokhile obekumele bawukhokhe ngoNovemba 30.
Isexwayiso sesithunyelwe kwiFifa ukuthi iqembu likhokhe imali esele, noma libhekane nokukhokha le mali ngokomyalelo weFifa isinenzalo, nokuthi limiswe ukusayinisa abadlali.
UMorgan Mammila, oke waqeqesha iChippa, useke waveza ukuthi useyingxenye yeqembu kodwa utshelwe ukuthi asebenzele ekhaya kuze kube uJuni wonyaka ozayo.
Ngokwakhe weneme ngale ndlela yokusebenza. Uzogxila emndenini wakhe, ukufunda nokweseka abasha abakhona eqenjini, ngethemba lokuthi iqembu lizoyibhekelela inkontileka yakhe.
Njengamanje iqembu liqeqeshwa uVusumuzi “Kanu” Vilakazi, osekungokwesibili ebuyela kulona.
UVilakazi uke wasebenza njengeTechnical Director kwiChilli Boyz isikhashana ngesizini edlule, washiya wajoyina iRichards Bay FC.
Kule sizini nje iyodwa iChippa seyike yasebenzisana noSinethemba Badela, uMusa Nyatama, uMorgan Mamilla, uLuc Eymael, noSinesipho Mali, ozoshiya maduze.
Nokho kulokhu iziphithiphithi zeChippa zingase ziholele ekutheni idliwe yizembe, uma kubhekwa indawo akuyona kwilogi yeBetway Premiership.
