IChiefs izoqala ngonzima ukuvikela iNedbank Cup
SIHLE NGUBO
Ompetha beNedbank Cup, iKaizer Chiefs, bazoqala ukuvikela indebe yabo ngokubhekana neStellenbosch FC, emdlalweni weLast 32 yanonyaka.
Lokhu kuhlaluke ngesikhathi kuqhathwa amaqembu azobhekana kulo mqhudelwano, eSandton, eGoli, ngoLwesine ebusuku.
IChiefs iyona evikela le ndebe eyithathe ngokushaya izimbangi i-Orlando Pirates, kowamanqamu, eMoses Mabhida Stadium, eThekwini, ngoMeyi nyakenye.
Endleleni ebheke kowamanqamu Amakhosi adlule kuyona iStellies, yiChippa United, kanti abhekane neMamelodi Sundowns kowandulela owamanqamu ngaphambi kokuyogadulisana neBucs.
IChiefs izobhekana neStellies leli qembu laseKapa seliqeqeshwa uGavin Hunt, oke walicija iqembu laseNaturena ngesizini ka-2020/2021.
UHunt ungene endaweni kaSteve Barker, oshiyile kwiStellies wayoqeqesha iSimba SC yaseTanzania ngoDisemba.
IChiefs neStellenbosch yiwona amaqembu amele iNingizimu Afrika kwiCAF Confederation Cup, esifinyelele emidlalweni yamaqoqo.
Imidlalo yeNedbank Cup izoqala ngesonto lesibili likaFebhuwari, kanti iPremier Soccer League (PSL) isazozimemezela izinsuku nezinkundla okuzodlalelwa kuzoba.
Isiyonke imidlalo yeNedbank Cup Last 32 imi kanje:
Stellenbosch FC vs Kaizer Chiefs; Army Rockets FC v Casric Stars; Hungry Lions FC v University of Pretoria; Tshakhuma v Orlando Pirates; Durban City FC v Chippa United; Polokwane City v AmaZulu FC; SSU M17 FC v Milford FC; Safa Western Cape v Luthuli Brigades FC; FC Cardinals v Jacksa Spears; Mkhambathi FC v Lerumo Lions; Upington City FC v Magesi FC; Highbury FC v Sekhukhune United; Lamontville Golden Arrows v Orbit College; Mamelodi Sundowns v Gomora United; TS Galaxy v Marumo Gallants; Siwelele FC v Richards Bay FC
