‘Ngeke siyibuyisele emuva indebe, imali nezindondo,’ kusho owaseSenegal
SIHLE NGUBO
UMame Niang, owayedlalela iMamelodi Sundowns, uthi yinto engeke yenzeke ukuthi beyiSenegal babuyisele indebe ye-Africa Cup of Nations (AFCON) emuva.
UNiang, ongowokudabuka eSenegal, usho lokhu nje into okukhulunywa ngayo kakhulu kulezi zinsuku, ukuphucwa kweSenegal indebe ye-AFCON yanikwa iMorocco.
Isigameko esenzeke kowamanqamu we-AFCON phakathi kwala mazwe, yiso esiholele kule mpicabadala.
Umbuzo omkhulu owokuthi kungani kulindwe izinyanga ezimbili zonke ukuthi kuthathwe lesi sinqumo okungangabazeki siyayihlaza i-Afrika kwamanye amazwekazi.
Lo mgadli, ofike kuleli ezodlala kwiMoroka Swallows, uthi akukho abakuzuze kwi-AFCON okuzobuyela emuva.
“Ngeke siyibuyisele emuva indebe, asiyibuyiseli emuva imali futhi asizibuyiseli emuva izindondo,” kusho uNiang ekhuluma noThabiso Mosia kwiRadio2000.
“Le ndebe ayibuyeli eMorocco. Yinto enjani leyo. Kubukeka sengathi le AFCON beyakhelwe iMorocco ukuthi iyithathe kodwa iSenegal yawona umcimbi.
“Manje iCAF seyifuna ukwenza izaba zokuthi iyinike bona.”
ISenegal ivele seyithathe isinqumo sokuludlulisela kwiCourt Arbitration of Sports (CAS) lolu daba, ngoba ayiyizwa eyokuthi kumele iphucwe indebe.
“Abantu eSenegal badiniwe kodwa izinto ezifana nalezi azingimangazi. Umuntu oshayeke kakhulu lapha yiCAF,” kuqhuba uNiang.
“Ngeke ulinde izinyanga ezimbili bese kuthi ngemuva kokubhiyoza esikwenzile…ngeke sivume ukuphathwa yiFIFA. Kumele siziphathele inhlangano yethu.
“Le nto nje ayiyinhle. Uma umuntu kumfanele ukunqoba myeke anqobe.
“Abanqobi baba abanqobi ngoba kubafanele lokho, ikakhulukazi uma umnqobi eqede umqhudelwano engehlulwanga.
“Wonke umuntu ucabanga ukuthi lokhu ukukhwabanisa. Kukhona ukukhwabanisa ebholeni lase-Afrika, ngeke sikubalekele lokho.”
Amacala adluliselwa kwiCAS athatha isikhathi eside kakhulu ukuthi axazululwe.
Ngenxa yalokhu kubukeka kuzoze kufike isikhathi seNdebe yoMhlaba ngoJuni kungaziwa ukuthi ubani umpetha wase-Afrika.
