Umdlali weChiefs ugqugquzela ubumbano ukuze baqede kwiTop 3
SIHLE NGUBO
IKaizer Chiefs inalo ithuba lokuqeda namaqembu amathathu aphezulu kwilogi yeBetway Premiership, uma bonke abadlali bengasebenza ngokuzikhandla.
Lona ngumbono womdlali wasemuva waMakhosi, u-Aden McCarthy, ngaphambi komdlalo olandelayo waleli qembu.
IChiefs izokwemukela iMagesi FC emdlalweni weBetway Premiership, eMoses Mabhida Stadium, eThekwini, ngoMgqibelo ngo-6 ntambama.
Leli qembu laseNaturena liya kulo mdlalo linokuzethemba kulandela ukushaya iDurban City ngo 1-0 koweligi ngeSonto eFNB Stadium.
IChiefs izoya kulo mdlalo isihlome ngoMcCarthy noSibongiseni “Ox” Mthethwa, abebengekho emdlalweni odlule ngenxa yezigwebo zamakhadi.
Lo mdlalo kulindeleke ukuthi ushube ngoba iChiefs ilwela ukunyuka kwilogi yePremiership, kanti ngakolunye uhlangothi iMagesi ifuna ukusuka emsileni.
Amakhosi asendaweni yesihlanu kwilogi ngamaphuzu angu-33, kanti asalele emuva ngemidlalo emibili emaqenjini angaphezu kwawo. IMagesi iyibambe emsileni ngamaphuzu angu-14 emidlalweni engu-20.
UMcCarthy ugcizelela ukubaluleka kobumbano kwiChiefs ukuze iphumelele.
“Ngicabanga ukuthi kumele sibe nombono ofanayo, lowo mbono ukuqeda kwiTop 3,” kusho uMcCarthy.
“Noma kungathiwa kwenzekani kwamanye amaqembu, yinto esingeke siyilawule leyo.
“Kodwa singenza okusemandleni ethu njengeqembu ukuqeda kwiTop 3 ukuze sidlale e-Afrika ngesizini ezayo.”
Lo mdlali, ozalwa uFabian McCarthy naye owayegijima kwiChiefs, ucele abalandeli ukuthi bangabahlamuki kulesi sikhathi esinzima.
“Ngiyabanxusa abalandeli ukuthi baseseke kulokhu, njengoba benzile eminyakeni eyishumi eyedlule ngaphambi kokuthi sigcine sinqobe indebe.
“Sicela konke nikwenze kube yinto eya phambili, niseseke, ngaleyo ndlela sizokwenza kangcono enkundleni.”
Ukunqoba kweChiefs kungayinyusela endaweni yesithathu kwilogi, bese kuncika ukuthi iPolokwane City naMaZulu FC badlala kanjani ngoMgqibelo ntambama.
IRise and Shine izotholana phezulu noSuthu emdlalweni weBetway Premiership, ngoMgqibelo ngo-3.30 ntambama.
