IPirates ethubeni lokuphinde iqukule kathathu ngesizini eyodwa
SIHLE NGUBO
I-Orlando Pirates isethubeni elihle lokuqeda isizini ka-2025/2026 nezindebe ezintathu ekhabetheni layo.
EZimnyama kusele kancane ziqukule indebe yeBetway Premiership eziyibanga neMamelodi Sundowns, njengoba sezihubela sakusha emidlalweni yeligi.
IPirates ibhaxabule iMagesi FC ngo 3-0 ngoMgqibelo, ukuqinisekisa ukuthi ayiphumi embangweni wesicoco seligi.
Leli qembu lihleli endaweni yesibili kwilogi ngamaphuzu angu-65, kanti endaweni yokuqala kuhlezi iSundowns ngamaphuzu angu-68.
Okunika iPirates ithuba elingcono lokukhala yemuke nesicoco seligi, ukuthi isalelwe yimidlalo emibili ezoyidlala kanti iSundowns seyisalelwe umdlalo owodwa.
Umehluko wamagoli uvuna eZimnyama, okuchaza ukuthi uma kusongwa isizini zilingana ngamaphuzu naBafana Ba’Style, indebe izoya eSigodini sikaMaminzela.
Kule sizini iPirates seyivele iqukule iMTN8 neCarling Knockout Cup.
EZimnyama zike zazithatha izindebe ezintathu ngesizini ka-2010/2011 neka-2011/2012.
Ngesizini ka-2010/2011 iPirates yanqoba isicoco seligi, iMTN8 neNedbank Cup.
Ngelandelayo (ka-2011/2012) yanqoba isicoco seligi, iMTN8 neTelkom Knockout.
Umqeqeshi wePirates, u-Abdeslam Ouadou, usethubeni lokuqopha umlando ngokuqukula izindebe ezintathu ngesizini yaphe yokuqala kwiBetway Premiership.
Akungabazeki ukuthi ekupheleni kwesizini abadlali bePirates nomqeqeshi wayo bazozitamuzela imiklomelo uma iqembu labo ligcina likhale lemuka nesicoco seligi.
Emdlalweni olandelayo iPirates izobhekana neDurban City, e-Orlando Amstel Arena, ngoMgqibelo ngo-3 ntambama.
EZimnyama zizobe sezivala isizini ngokubhekana ne-Orbit College eDr Molemela Stadium, ngoMeyi 23.
Yomibili le midlalo iPirates izoyidlala seyazi idingani njengoba iSundowns izobe isiyidlale yayiqeda imidlalo yeBetway Premiership.
Abafana Ba’Style bazobe bedlala umdlalo wokugcina weligi ngoLwesibili, lapho bazobhekana neTS Galaxy.
Lokhu kuphoqwa ukuthi iSundowns izodlala umdlalo wamanqamu weCAF Champions League ne-ASFAR, ngoMeyi 16 noMeyi 23/24.
