IChiefs inesinqumo esinzima okumele isithathe ‘ngotolika’ bayo
SIHLE NGUBO
IKaizer Chiefs kumele ithathe isinqumo mayelana nabaqeqeshi bayo ababili ababambile, uCedric Kaze noKhalil Ben Youssef, njengoba kuzogoqwa isizini ka-2025/2026.
Laba baqeqeshi bathathe izintambo ngemuva kokushiya kukaNasreddine Nabi, abebengamaphini akhe, ngasekuqaleni kwesizini.
Kubhekiwe ukuthi abaphathi baMakhosi bazobachitha yini laba baqeqeshi, bafune umqeqeshi omusha njengoba bebebambile.
Okungenza kube nzima kubaphathi beChiefs ukudedela uKaze noBen Youssef, ukuthi benze into ekade yagcina ukwenzeka kuleli qembu laseNaturena.
IChiefs yagcina kumasizini ayisithupha edlule ukuhlanganisa amaphuzu angu-50 emidlalweni yeligi, okuyinto ebibakhathaza abaphathi nabalandeli bayo.
Ngaphezu kwalokho kumasizini amabili edlule Amakhosi ehlulekile ukuzibekisela indawo kwiTop 8, okwenze inhlekisa abalandeli bayo kwamanye amaqembu.
Kule sizini iChiefs seyinamaphuzu angu-51 yize isasalelwe imidlalo emibili yeBetway Premiership.
Ngokuhlanganisa la maphuzu Amakhosi asezibekisele indawo kwiCAF Confederation Cup yangesizini ezayo, futhi azodlala nakanjani kwiMTN8.
AmaZulu FC, angemuva kweChiefs kwilogi yeBetway Premiership, ngeke esakwazi ukuligudluza leli qembu laseNaturena endaweni yesithathu elizoqeda kuyona, noma kungathiwa kwenzekani emidlalweni esele yeligi.
Le mpumelelo yeChiefs akungabazeki ukuthi izocindeza abaphathi bayo uma sekufanele bathathe isinqumo mayelana nomqeqeshi ozohola iqembu ngesizini ezayo.
Ukwenza kahle kukaKaze noBen Youssef kungabukwa njengento okumele yakhele phezu kwayo iChiefs, okungasho ukubagcina laba baqeqeshi, ukuze baqhubeke nokwakha iqembu.
Nokho kukhona abakholwa ukuthi iChiefs idinga umqeqeshi onamava nohlonishwayo, ukuze ibuyele ezingeni layo lakudala.
UPitso Mosimane useke wakuveza ukuthi angayicija iChiefs uma abaphathi bayo bakhuluma naye, ngoba yena ngeke afese kuyona.
Omunye umqeqeshi oseke wamataniswa nokuya kwiChiefs, uManqoba Mngqithi okumanje uqeqesha iLamontville Golden Arrows.
NgeSonto Amakhosi ajabulise abalandeli nawo eshaya iSekhukhune United ngo 2-0 ePeter Mokaba Stadium.
UTashreeq Morris noMfundo Vilakazi yibona abashaye amagoli Amakhosi ngasekupheleni komdlalo, sekubukeka sengathi kuzophela kungu 0-0.
UMorris ubedlala umdlalo wakhe wokuqala kule sizini njengoba ekhumbuze abalandeli ukuthi usekhona eqenjini ngokushaya igoli.
Emdlalweni olandelayo iChiefs izobhekana naMaZulu FC, eMoses Mabhida Stadium, eThekwini, ngoMgqibelo ngo-3 ntambama.
Amakhosi ngeke anyakaze eThekwini njengoba ezophinde abhekane neChippa United, enkundleni efanayo, emdlalweni wokugcina weBetway Premiership ngoMeyi 23.
