I-Durban City ithole abanamava abasuka kwiChiefs nePirates

SIHLE NGUBO

I-Durban City seyihlabane ngabadlali ababili abanamava njengoba ilungiselela ukuqala kwesizini entsha yeBetway Premiership ka-2026/2027.

Ompetha beNedbank Cup bathole uGaston Siriano, ovela kwiKaizer Chiefs noGoodman Mosele osuka kwi-Orlando Pirates.

USirino ayivuselelwanga inkontileka yakhe ebiphela ngoJuni kuMakhosi, okuchaza ukuthi iCity imthole bhusende.

Lo mdlali wase-Uruguay ufike kwiChiefs ngesizini ka-2024/2025 esuka kwiMamelodi Sundowns.

Ube nesandla ekutheni iChiefs inqobe iNedbank Cup ngesizini ka-20252026, obekungokukuqala iqukula indebe ngemuva kwenyaka eyishumi.

USirino ushaye iphenathi emdlalweni wamanqamu iChiefs ewunqobe ngo 2-1 ibhekene nezimbangi ezindala iPirates, eMoses Mabhida Stadium, eThekwini.

Elinye igoli laMakhosi kulo mdlalo lashaywa uYusuuf Maart, osedlala e-Austria.

UMosele yena usengumdlali wePirates, embolekisile kuleli qembu laseThekwini.

Lo mdlali selokhu esayine kwiBucs uyabolekiswa njalo uma kuqala isizini.

Usebolekiswe kwiChippa United izikhawu ezintathu njengoba manje esebolekwa yiCity.

Leli qembu lizoqeqeshwa uYoussef Ben Khalil, obecija iChiefs ngokubambisana noCedric Kaze ngesizini edlule.

Omunye umdlali olandwe yiCity uTashreeq Morris, naye obesemabhukwini eChiefs ngesizini edlule.

ICity izovula imidlalo yeBetway Premiership ngokubhekana neSekhukhune United, eNew Peter Mokaba Stadium, ngo-Agasti 1.

IBabina Noko seyiqeqeshwa uKaze nokuchaza laba baqeqeshi bazozwana amandla zisuka kade besebenza ndawonye.