I-Pirates ilokhu ibasayinise njalo abadlali abasha

SIHLE NGUBO

I-Orlando Pirates ilokhu iqhubeke njalo nokusayinisa angadlali ukulungiselela isizini entsha yeBetway Premiership.

IBucs bekubukeka sengathi isayinise abadlali abenele njengoba kuzoqala isizini entsha kodwa isalokhu imemezela abadlali abasha.

NgoLwesithathu eZimnyama zimemezele ukuthi sezisayinise uThapelo Mokobodi obengumdlali wasesiswini weStellenbosch FC.

UMokobodi, oneminyaka engu-23, usayine inkontileka yeminyaka emithathu neZimnyama.

Kubadlali asebesayiniswe yiPirates, selokhu kuvulwe iwindi lokuhwebelana ngabadlali, kukhona uSebastian Pedersen okungumgadli waseNorway osuka kwiSogndal Fotball.

Lo mdlali, oneminyaka engu-27, usayine inkontileka yeminyaka emibili nePirates.

Kukhona noMthetheleli Mthiyane, osuka kwiStellenbosch, kanti naye udlala esiswini.

USibangani Zulu, obegijima kwiRichards Bay FC, ukhona kweZimnyama kanti udlala emuva. UGamphani Lungu noBohlale Ngwato basayine bevela kwiSiwelele FC.

UMatome Mmolai naye ungumdlali wasesiswini osuka kwiMotsepe Foundation Championship.

IPirates izovula imidlalo yeBetway Premiership ngokubhekana nomakoti iMilford FC, e-Orlando Amstel Arena Stadium, ngoMgqibelo ngo-3 ntambama.

Ngokwesitatimende esikhishwe yiChippa United, leli qembu laseGqeberha lizodlala umdlalo walo nePirates, eKings Park Stadium, eThekwini, ngo-Agasti 16.

INelson Mandela Bay Stadium neBaffulo City Stadium, okuyizinkundla ezisetshenziswa yiChilli Boys, zizobe zilungiswa ngo-Agasti.

IBucs iyona evikela isicoco seBetway Premiership kanti maduze izoqala ukuvikela iMTN8, engenye yezindebe ezintathu ezithathe ngesizini edlule.

Enye indebe ekhale yemuka neZimnyama ngesizini edlule yiCarling Black Label Cup.