‘Buyisani imali yeVAR,’ kusho uMcKenzie kwiSAFA
SIHLE NGUBO
Ungqongqoshe weZemidlalo, uBuciko namaGugu kuzwelonke, uGayton McKenzie, uthi ufuna ibuye imali yeVideo Assistant Referee (VAR) ayinika iSouth African Football Association (SAFA).
Ngokusho kukaMcKenzie, kumele ngabe seyifakiwe iVAR eNingizimu Afrika ngoba wawukhipha u-R13 million ukuze kuqaliswe izinhlelo zokuyifaka.
UMcKenzie, owaziwa ngokungafihli uma kukhona okumcasulile, uthi iSAFA inquba intwala ngewisa ngokungayifaki iVAR ebe ayinika imali.
“Yima ngikutshele ukuthi kwenzekani ngeVAR. Imithetho yeFIFA ikubeka kucace ukuthi kumele yenziwe yiSAFA,” kusho uMcKenzie.
“Njengongqongqoshe ngenza izinto ezimbili. Ngathatha izintatheli, ngathatha izikhulu ngabasa eSpain ukuze bahambe bayobona nase-UK, siqhathanise ukuthi yikuphi okungcono.
“Ngabe sengithatha u-R13 million ngawunika iSAFA. Ngingakutshela manje ukuthi ngeke ngenze okungaphezu kwalokho njengongqongqoshe.”
Kukhalwa wonke amasonto ngezinqumo zonompempe ezingagculisi, nezenza kube nezinkulumo eziningi uma kade kudlala imidlalo yeBetway Premiership.
ISAFA inakho ukubamisa onompempe abangenzi kahle, kodwa bayabuya badlalise imidlalo yeBetway Premiership.
“Ngibhalele iSAFA incwadi ngayitshela ukuthi ayibuyise imali, yathi icela ngiyinike izinsuku ezingu-21,” kuqhuba uMcKenzie.
“Ngidiniwe ngoba angazi ukuthi yini enye engaphezulu engingayenza.
“Imali kahulumeni le, yimina engiyinakekelayo. Bathe bazokwenza okuthile ezinsukwini ezingu-21. Ngokwami ngibone ukuthi bekuthule kungenziwa lutho.”
Umbuzo omkhulu owokuthi ngabe yini edala ukuthi iSAFA ingayiqalisi iVAR uma kungukuthi seyanikwa imali yokwenza lokho.
Le nhlangano idume ngokudla imali nokungabakhokheli ngesikhathi amabhonasi abadlali beBafana Bafana neBanyana Banyana.
Kuyimanje umengameli weSAFA, uDanny Jordan, uhamba icala lokusolwa ngokumoshozela u-R10 million wale nhlangano.
