Uyazibonga ngokulaxaza iDowns osevelele kwiStellies
UThabo Moloisane, ongomunye wezihlabani zeStellenbosch, uyazibonga uma ebuka inqubekelaphambili aseyibonile emsebenzini wakhe kusukela eshiye iMamelodi Sundowns.
Uyazincoma ngesinqumo sakhe sokushiya eChloorkop yize kwakungelula ukusithatha.
Le nsizwa eneminyaka engu-25 ubudala isiphenduke insika yeStellenbosch esefomini encomekayo muva nje.
Isanda kuqopha umlando inqoba iCarling Knockout ngoDisemba iba yiqembu lokuqala ukudla le ndebe.
Kumanje iqopha elinye irekhodi kwi-PSL njengoba seyidlale imidlalo engu-17 ingahluliwe kuyo yonke imiqhudelwano.
Lokhu kuhlanganisa ukunqoba emidlalweni engu-13 nokudlala ngokulingana kwemine.
Ecabanga ngohambo lwakhe, uThabo Moloisane uzwakalise ukuzethemba ngesinqumo sokushiya iSundowns, ebona imiphumela ebonakalayo esikhona kusukela ashiya.
Uphinde wancoma iqhaza lesikhathi sakhe kwiMaritzburg United neCape Town All Stars ekuthuthukiseni umsebenzi wakhe.
Yize ephumelele kwiStellenbosch, uThabo Moloisane usabonga iSundowns ngokuba nomthelela ekuthuthukisweni kwakhe.
“ISundowns ibambe elikhulu iqhaza emsebenzini wami,” kusho lo mdlali okhiqizwe yinkulisa yeSundowns.
“Ngahlala iminyaka eyisikhombisa kwiSundowns. Ngesikhathi ngishiya iSundowns ngaya kwiCape Town All Stars.
“I-NFD yangisiza kakhulu, amasizini amabili engiwahlale kwiCape Town All angisize kakhulu, angenza ngakholwa ukuthi ngingakwazi ukungena kwiPremiership.
Kwi-All Stars nganikwa ithuba lokuvuselela (inkontileka yami), kodwa ngathi, ‘uyazi yini, ake ngithathe ithuba ngiye kwiPremiership’…
“Ngabe sengijoyina iMaritzburg United,” kuqhuba uThabo Moloisane engxoxweni yakhe nabeSowetan ngoLwesibili.
Ephawula ngokungahlulwa emidlalweni engu-17 kulandelana kule sizini, uMoloisane uncome umqeqeshi wabo uSteve Barker.
Uthi lomakadebona womqeqeshi unendlela wokuqinisekisa ukuthi abaphazanyiswa yidumela eliza nokwenza kahle kwabo.
“Sinenhlanhla enkulu ngokuba nomqeqeshi ofana noSteve,” kusho uMoloisane.
“Uhlale esitshela ukuthi akukhona ukuthi abantu bacabangani ngathi, akukhona ukuthi siwina imidlalo emingaki kodwa okubalulekile esikwenza ngosuku lomdlalo.
FUNDA NALA: Uvele wakhihla isililo owaseBrazil ekhuluma ngokucwaswa
“Ngakho-ke, akusho ukuthi ufuna ukwephula amarekhodi nokudlala imidlalo eminingi ungahluliwe kodwa kumayelana nokuya emdlalweni uzibonakalise,” kusho uMoloisane.
